धुळ्यातून धक्कादायक बातमी समोर आली आहे. शेतशिवराजवळील एका नाल्यात नागरिकांना एक अज्ञात मृतदेह आढळून आला. या घटनेने नागरिकांमध्ये एकच खळबळ उडाली. याप्रकरणी पोलिसांत तक्रार नोंदवण्यात आली असून पोलीस या घटनेचा सविस्तर तपास करत आहेत. सदर घटना आज सकाळच्या सुमारास घडली आहे.

धुळे शहरालगत असलेल्या पारोळा रोडवरील फागणे गावाच्या हद्दीत, आज सकाळी परिसरातील काही नागरिक या भागातून पुलावरून जात असताना त्यांना नाल्यात एक मृतदेह दिसून आला. त्यानंतर त्यांनी तातडीने या घटनेची माहिती स्थानिक पोलिसांना दिली.

या घटनेची माहिती वाऱ्यासारखी पसरल्याने फागणे आणि परिसरातील नागरिकांनी घटनास्थळी मोठी गर्दी केली होती. घटनेचे गांभीर्य लक्षात घेता पोलिस पथक तातडीने घटनास्थळी दाखल झाले. पोलिसांनी गावकऱ्यांच्या मदतीने मृतदेह बाहेर काढण्याचे काम सुरू केले.

अद्याप संबंधित मृत व्यक्तीची ओळख पटलेली नसून, पोलिसांनी पंचनाम्याची कार्यवाही सुरू केली आहे. हा घातपात आहे की आत्महत्या याचा तपास पोलिसांकडून केला जात असून मृतदेह शवविच्छेदनासाठी जिल्हा रुग्णालयात पाठवण्यात येणार आहे. या घटनेने परिसरात खळबळ उडाली आहे.