दिल्लीच्या गाझियाबादमधील तिलामोडमध्ये प्लॉट खरेदी करण्यासाठी आलेल्या एका महिलेवर धावत्या कारमध्ये सामूहिक बलात्कार करण्यात आल्याची संतापजनक बातमी समोर आली आहे. धक्कादायक म्हणजे अत्याचारानंतर आरोपींनी महिलेला कारमधून फेकून दिले आणि पलायन केले. या घटनेचा सीसीटीव्ही देखील समोर आला आहे. महिला गंभीर जखमी असून तिच्यावर रुग्णालयात उपचार सुरु आहेत. पोलिसांनी या प्रकरणी प्रॉपर्टी डीलर विकास आणि आशू यांच्यासह तिघांविरुद्ध तक्रार दाखल केली आहे. तसेच पुढील तपास सुरु केला आहे.

मिळालेल्या माहितीनुसार, पीडित महिला हरियाणातील पलवलची रहिवासी आहे. ती प्लॉट खरेदी करण्यासाठी गाझियाबादमधील लोणी येथे आली होती. तिथे तिची भेट विकास आणि आशू या प्रॉपर्टी डीलर्सशी झाली. ६ एप्रिल रोजी दुपारी ती प्लॉट पाहण्यासाठी गाझियाबादला आली होती आणि लोणीकडे जात होती. प्रॉपर्टी डीलर्सने तिला तिलामोड येथे प्लॉट दाखवण्याच्या बहाण्याने घेऊन गेले. तिथे महिलेचं आदरतिथ्य करण्यात आलं.

यादरम्यान कोल्ड्रिंक्समध्ये गुंगीचं औषध टाकून देण्यात आलं. त्यानंतर विकास आणि आशू यांनी पीडितेला कारमध्ये जाऊन बसायला सांगितलं. महिलेला गुंगी आल्याने ती बेशुद्ध झाली आणि त्यानंतर धावत्या गाडीत आरोपींनी तिच्यावर बलात्कार केला. इतक्यावरच न थांबता या नराधमांनी महिलेला एका निर्जनस्थळी फेकून दिले. ७ एप्रिल रोजी शुद्धीवर आल्यानंतर तिला भरतपूर येथील रुग्णालयात दाखल करण्यात आले.

एसीपींनी सांगितले की, भरतपूर पोलिसांनी झिरो एफआयआर नोंदवला आणि ८ एप्रिल रोजी राजस्थान पोलिसांनी त्यांना माहिती न देता महिलेला संजय नगर येथील संयुक्त रुग्णालयात दाखल केले.सदर घटना अत्यंत गंभीर असून पोलिसांनी या प्रकरणी तपास सुरू केला आहे. तसेच आरोपींविरोधात पोलीस ठाण्यात गुन्हा दाखल करण्यात आला आहे.