राजधानी दिल्लीमध्ये भयंकर घटना घडली. आई आणि मुलाच्या पवित्र नात्याला काळीमा फासणारी ही घटना दिल्लीच्या हौज काझी भागात घडली. हैवान बनलेल्या ३९ वर्षीय व्यक्तीने आपल्या ६५ वर्षीय आईवर दोन वेळा बलात्कार केला. या प्रकरणी आरोपीला पोलिसांनी अटक केली. पीडित महिलेने पोलिसांना सांगितले की, 'माझा मुलगा बलात्कार करून मला शिक्षा देत होता. कारण त्याला संशय होता की काही वर्षांपूर्वी माझे विवाहबाह्य संबंध होते.'

हिदुस्तान टाईम्सच्या रिपोर्टनुसार, पीडित महिलेने आपल्या २५ वर्षीय मुलीसोबत शक्रवारी हौज काजी पोलिस ठाण्यात धाव घेत तक्रार दाखल केली. ही घटना या महिन्याच्या सुरूवातीला घडला. आरोपीचे कुटुंबीय हज यात्रेवरून परत आल्यानंतर आईवर बलात्कार केला. तक्रारीनुसार, पीडित महिला तिचा नवरा निवृत्त सरकारी कर्मचारी, आरोपी मुलगा आणि मुलीसह हौज काझी परिसरात राहते. तिची मोठी मुलगी विवाहित असून ती त्याच परिसरात तिच्या कुटुंबीयांसोबत राहते.

१७ जुलै रोजी पीडित महिला, तिचा नवरा आणि धाकटी मुलगी हज यात्रा करण्यासाठी सौदी अरेबियाला गेले होते. ते हज यात्रेला गेले असता आरोपी मुलाने वडिलांना फोन करून परत येण्यास सांगितले. आम्ही सौदीला असताना तो सतत फोन करून आम्हाला परत बोलावून घेत होता. आरोपीने वडिलांना सांगितले की, 'तुम्ही दिल्लीला परत या आणि आईला घटस्फोट द्या.' पीडित महिलेने सांगितले की, तो माझ्या नवऱ्याला म्हणत होता की मला घटस्फोट द्यावा. तो त्यांना सांगत होता की त्याला कळाले होते की तो लहान असताना त्याच्या धाकट्या बहिणीच्या जन्मापूर्वी आणि माझा नवरा कामासाठी बाहेरगावा गेला तेव्हा माझे इतर पुरुषांशी विवाहबाह्य संबंध होते.'

पीडित महिलेने पुढे सांगितले की, 'माझ्या मुलाच्या सततच्या फोन्स कॉल्समुळे आम्ही त्रस्त झालो आणि १ ऑगस्ट रोजी दिल्लीला परत आलो. आम्ही घरी आल्यानंतर माझ्या मुलाने माझ्यावर हल्ला करत मारहाण केली. त्याने मला माझा बुरखा काढायला लावला. मला एका खोलीत बंद केले आणि पुन्हा मारहाण केली. त्याने माझ्या नवऱ्याला सांगितले की त्यांनी मला बिघडवले आहे.' हल्ल्यामुळे घाबरून पीडितेने तिचे घर सोडले आणि तिच्या मोठ्या मुलीसोबत राहू लागली. ११ ऑगस्टला ती परत घरी आली.

पीडित महिलेने आरोप केला आहे की, मी घरी परत आले त्या दिवशी रात्री ९:३० च्या सुमारास माझ्या मुलाने कुटुंबातील इतर सदस्यांना सांगितले की मला माझ्या आईशी एकांतात बोलायचे आहे. त्यानंतर, त्याने मला एका खोलीत बंद केले आणि आणि माझ्यावर बलात्कार केला. माझ्यावर बलात्कार करताना तो म्हणाला की तो मला माझ्या मागच्या कृत्यांची शिक्षा देत आहे. मी त्याला बोलत राहिले की असं करू नको मी तुझी आई आहे. पण त्याने काहीच ऐकले नाही.'

या घटनेनंतर महिलेला मोठा धक्का बसला. मुलाच्या या घृणास्पद कृत्यामुळे घाबरलेल्या महिलेने कुणालाच घटनेची माहिती दिली नाही. त्यानंतर ती मुलगा पुन्हा असं काही करू नये यासाठी मुलीच्या खोलीत झोपू लागली. गुरुवारी पहाटे ३.३० वाजताच्या सुमारास आरोपी तिच्या खोलीत गेला आणि तिच्यावर पुन्हा बलात्कार केला. दुसऱ्या दिवशी पीडित महिलेने तिच्या धाकट्या मुलीला संपूर्ण घटना सांगितली. तिने तिला पोलिसांकडे जाण्यास सांगितले. त्यानंतर आई आणि मुलीने हौज काझी पोलिस ठाण्यात धाव घेत तक्रार दाखल केली. या प्रकरणी पोलिसांनी आरोपीविरोधात गुन्हा दाखल करत त्याला अटक केली. पोलिस पुढचा तपास करत आहेत.