Crime News: हरियाणातील गुरुग्राम येथील मानेसर भागातून एक धक्कादायक आणि हृदयद्रावक घटना समोर आली आहे. लग्नानंतर अवघ्या तीन महिन्यांतच एका नवविवाहितेची निर्घृण हत्या करण्यात आल्याचा आरोप तिच्या पती आणि त्याच्या गर्लफ्रेंडवर करण्यात आला आहे. या प्रकरणाने परिसरात मोठी खळबळ उडाली असून, आरोपी पतीने हा गुन्हा लपवण्यासाठी धक्कादायक खोटी कहाणी रचल्याने परिसरात एकच खळबळ उडाली आहे.

मधू २१ मेपासून बेपत्ता

मृत महिलेचे नाव मधू असे असून तीन महिन्यांपूर्वीच तीचे मोठ्या थाटामाटात लग्न झाले होते.लग्नानंतर नव्या आयुष्याची स्वप्ने पाहणाऱ्या मधूचा शेवट इतक्या भयानक पद्धतीने होईल, याची कल्पनाही तिच्या कुटुंबीयांना नव्हती. पोलिसांच्या माहितीनुसार, २१ मे रोजी मधू अचानक बेपत्ता झाली होती. तिच्या कुटुंबीयांनी तिचा सर्वत्र शोध घेतला, मात्र तिचा कोणताही मागमूस लागत नव्हता. त्यामुळे तिच्या कुटुंबियांनी पोलीसात तक्रार दाखल केली.

पती म्हणाला 'ती पळून गेली'

दरम्यान, मधू बेपत्ता झाल्यानंतर तिच्या पतीने एक धक्कादायक दावा केला. त्याने कुटुंबीयांना आणि पोलिसांना सांगितले की, मधू घरातील सर्व दागिने घेऊन पळून गेली आहे. सुरुवातीला कुटुंबीयांनी त्याच्या बोलण्यावर विश्वास ठेवला; मात्र दिवसेंदिवस मधूचा काहीच पत्ता न लागल्याने संशय वाढू लागला. अखेर कुटुंबीयांनी थेट पतीवरच संशय व्यक्त करण्यात सुरुवात केली.

गर्लफ्रेंडच्या बाथरुममध्ये आढळला मृतदेह

तपासादरम्यान पोलिसांचा संशय आरोपीच्या प्रेयसीवर गेला. रविवारी पोलीस तिच्या खोलीपर्यंत पोहोचले असता, दरवाजाला बाहेरून कुलूप लावलेले होते. पोलिसांनी दरवाजा तोडून आत प्रवेश केला. त्यावेळी खोलीतून दुर्गंधी येत होती. बाथरूमचा दरवाजा उघडताच पोलिसांना मधूचा कुजलेल्या अवस्थेतील मृतदेह आढळून आला. हे दृश्य पाहून पोलिस आणि परिसरातील लोक त्यावेळी हादरून गेले.

मृतदेहाची अवस्था पाहता, खून काही दिवसांपूर्वीच करण्यात आल्याचा प्राथमिक अंदाज व्यक्त करण्यात येत आहे. पोलिसांनी मृतदेह शवविच्छेदनासाठी पाठवला असून, आरोपी पती आणि त्याच्या गर्लफ्रेंडची चौकशी सुरू आहे. मानेसर पोलीस या प्रकरणाचा अधिक तपास करत आहेत.