छत्रपती संभाजीनगर, ता. ६ जून २०२४

शेतीच्या वादातून झालेल्या मारहाणीत शेतकऱ्याचा मृत्यू झाल्याची धक्कादायक घटना छत्रपती संभाजीनगर जिल्ह्यामध्ये घडली आहे. छत्रपती संभाजीनगर जिल्ह्यातील वैजापूर तालुक्यात झालेल्या या घटनेने सर्वत्र खळबळ उडाली असून आरोपींना ताब्यात घेणार नाही, तोपर्यंत मृतदेह ताब्यात घेणार नाही असा आक्रमक पवित्र मृताच्या नातेवाईकांनी घेतला आहे.

याबाबत सविस्तर माहिती अशी की, शेतीच्या वादातून ५ ते ६ जणांनी केलेल्या मारहाणीत शेतकऱ्याचा मृत्यू झाल्याची धक्कादायक घटना वैजापूर तालुक्यातल्या गाढेपिंपळगाव येथे घडली. पेत्रास हरकु सोनवणे असे मृत्यू झालेल्या शेतकऱ्याचे नाव आहे. काल (बुधवार, ता. ५) दुपारी १-२ च्या दरम्यान शेतीवरुन वाद झाला.

यावेळी सोनवणे यांना ५-६ जणांनी बेदम मारहाण केली. या मारहाणीत त्यांच्या डोक्याला तसेच पायाला गंभीर इजा झाल्या होत्या. घटनेनंतर जखमी अवस्थेत त्यांनी छत्रपती संभाजीनगर येथील घाटी रुग्णालयात तातडीने दाखल करण्यात आले. मात्र रात्री उशिरा उपचारादरम्यान त्यांचा दुर्दैवी मृत्यू झाला.

दरम्यान, या घटनेनंतर नातेवाईकांकडून संताप व्यक्त केला जात असून जोपर्यंत आरोपींना अटक होत नाही तो पर्यंत मृतदेह स्विकारणार नाही अशी आक्रमक भूमिका घेतली आहे. या घटनेने सर्वत्र खळबळ उडाली असून पोलीस या प्रकरणाचा अधिक तपास करत आहेत.