बिहारमधून धक्कादायक बातमी समोर आली आहे. राज्यातील सुपौल जिल्ह्यात एका विवाहित महिलेचा संशयास्पद मृत्यू झाल्याने परिसरात खळबळ उडाली आहे. संतापजनक म्हणजे पीडित महिलेच्या लग्नानंतर सुद्धा तिच्या पतीचे आणि तिच्या जावेचे अनैतिक संबंध सुरु होते. महिलेने या प्रेमसंबंधांना विरोध केल्याने तिचा काटा काढला. या प्रकरणी पोलीस ठाण्यात गुन्हा दाखल करण्यात आला असून पुढील तपास सुरु आहे.

मिळालेल्या माहितीनुसार,मृत महिलेचे नाव बुच्ची देवी असे आहे. तिचा विवाह २०२१ साली सुजित कुमार खरगा याच्याशी झाला होता. मात्र, लग्नानंतरही पतीचे त्याच्या वाहिनीसोबत अनैतिक संबंध सुरू असल्याचा आरोप आहे. या कारणावरून पती-पत्नीमध्ये सतत वाद होत असल्याचे स्थानिकांनी सांगितले.मंगळवारी घरात कोणतीही हालचाल दिसत नसल्याने शेजाऱ्यांना संशय आला. त्यांनी तात्काळ महिलेच्या माहेरच्या नातेवाईकांना याची माहिती दिली. त्यानंतर तिचा भाऊ ललन कुमार घटनास्थळी पोहोचला असता, घरात बुच्ची देवीचा मृतदेह पलंगावर पडलेल्या अवस्थेत आढळून आला. विशेष म्हणजे, घरात कोणीच उपस्थित नव्हते.

मृत महिलेच्या कुटुंबीयांनी आरोप केला आहे की, सुजित कुमारने आपल्या वाहिनीच्या मदतीने पूर्वनियोजित कट रचून बुच्चीचा गळा दाबून खून केला. तसेच, पुरावे नष्ट करण्याचाही प्रयत्न करण्यात आला असल्याचा संशय व्यक्त करण्यात आला आहे. गावकऱ्यांच्या मते, या अनैतिक संबंधांमुळे कुटुंबात सतत तणावाचे वातावरण होते. पंचायतीमार्फत अनेक वेळा हे प्रकरण सोडवण्याचा प्रयत्न करण्यात आला होता. काही दिवसांपूर्वी झालेल्या बैठकीत सुजित आणि त्याच्या कुटुंबीयांनी वाद मिटवण्याचे आश्वासन दिले होते.

घटनेची माहिती मिळताच पोलीस अधिकारी सुरेंद्र कुमार आणि वीरपूर पोलीस ठाण्याचे अधिकारी राजकिशोर मंडल घटनास्थळी दाखल झाले. प्रकरणाची गंभीरता लक्षात घेऊन तपासाला सुरुवात केली आहे. फॉरेन्सिक पथकाने घटनास्थळावरून महत्त्वाचे पुरावे गोळा केले आहेत. पोलीसांच्या प्राथमिक तपासानुसार, हा गळा दाबून खून केल्याचा प्रकार असू शकतो. मृतदेह शवविच्छेदनासाठी पाठवण्यात आला असून, अहवालानंतरच मृत्यूचे नेमके कारण स्पष्ट होणार आहे. दरम्यान, फरार आरोपींचा शोध घेण्यासाठी पोलिसांनी विशेष पथके तयार केली असून पुढील तपास सुरु आहे.