बिहारमधील मुझफ्फरपूर जिल्ह्यातील गरहान ओ.पी. परिसरात माणुसकीला काळिमा फासणारी बातमी समोर आली आहे. एका जत्रेदरम्यान तरुणीला गुंगीचे औषध देऊन तिच्यावर सामूहिक बलात्कार करण्यात आला, तसेच तिला तीन दिवस ओलीस ठेवण्यात आले होते. धक्कादायक म्हणजे या गंभीर प्रकरणात पोलिसांनी एफआयआर दाखल करण्यासाठी टाळाटाळ केली.काही दिवसांनंतर आरोपींवर गुन्हा दाखल करत पोलिसांनी त्यांना अटक केली. या घटनेने तरुणीच्या पालकांनी संताप व्यक्त केला आहे.

मिळालेल्या माहितीनुसार, पीडित तरुणी बोचाहान पोलीस ठाण्याच्या हद्दीत तिच्या कुटुंबियांसोबत राहते. तिच्या मावशीवर सीतामढी रोडवरील एका खाजगी रुग्णालयात उपचार सुरु होते. तरुणी मावशीसोबत रुग्णालयात थांबायची. यादरम्यान तिची ओळख एका तरुणाशी झाली. त्या तरुणाने मदतीच्या बहाण्याने तिचा मोबाईल नंबर घेतला आणि नंतर तिला एका जत्रेत भेटायला बोलावले.

जत्रेत आरोपीने तिच्या शीतपेयात गुंगीचे औषध मिसळले, ज्यामुळे ती बेशुद्ध झाली. त्यानंतर ऋषी यादव आणि त्याच्या दोन साथीदारांनी तिला एका निर्जन मैदानावर नेऊन तिच्यावर सामूहिक बलात्कार केला. पीडितेचा आरोप आहे की, आरोपीने यापूर्वीही तिच्यावर बलात्कार केला होता आणि विरोध केल्यास तिला एका ऑर्केस्ट्राला विकण्याची धमकी दिली होती. तरुणी शुद्धीवर आली तेव्हा ती रुग्णालयात होती.

पीडितेने सांगितले की, गुन्हा दाखल केल्यास जीवे मारण्याची धमकी आरोपीने दिली होती. या प्रकरणात पोलिसांचा निष्काळजीपणाही उघडकीस आला आहे. पीडिता एसकेएमसीएच ओपी आणि अहियापूर पोलीस ठाण्यात गेली, परंतु तिच्या तक्रारीवर तात्काळ कारवाई झाली नाही. एफआयआर दाखल करण्यासाठी तिने तीन दिवस घालवले. पीडितेने एक व्हिडिओ तयार करून सोशल मीडियावर व्हायरल केला होता. हा व्हिडिओ व्हायरल झाल्यानंतर पोलीस सक्रिय झाले आणि गुन्हा दाखल करण्यात आला. पोलिसांनी या प्रकरणी एफआयआर दाखल करून मुख्य आरोपी ऋषी यादवला अटक केली आहे. इतर आरोपींचा शोध सुरू आहे. घटनेनंतरही पोलिसांच्या कारवाईवर प्रश्नचिन्ह उपस्थित केले जात आहे.