शुभम देशमुख, भंडारा

सासऱ्याची संपत्ती मिळावी, या लालसेपोटी जावयानंचं सासऱ्याची निर्घृण हत्या केल्याची खळबळजनक घटना भंडाऱ्यात समोर आली आहे. मित्राच्या मदतीनंचं जावयानं ही हत्या केल्याप्रकरणी आता कारधा पोलिसांनी आरोपी जावई आणि त्याच्या मित्राला अटक केली आहे. ही निर्घृण हत्या भंडाऱ्याच्या कोकणागड इथं घडली. किशोर कंगाले (60) असं मृत सासऱ्याचं नावं आहे. तर पोलिसांनी अटक केलेल्या आरोपीमध्ये जावई अमित लांजेवार (36) आणि त्याचा मित्र योगेश पाठक (26) यांचा समावेश आहे.

मिळालेल्या माहितीनुसार, मृत किशोर कंगाले हे सेवानिवृत्त मुख्याध्यापक असून त्यांना एकुलती एक मुलगी असून तिनं अमित लांजेवार याच्यासोबत आंतरजातीय विवाह केला आहे. या विवाहाला सुरुवातीपासूनच मृत किशोर कंगाले यांचा विरोध होता. त्यामुळं मृतक हे कोकणागड इथं राहून शेती सांभाळत होते.

मुलीच्या आंतरजातीय विवाहमुळे मुलगी आणि जावयाला संपत्ती आणि त्यांची कुठलीही मालमत्ता देणार नाही, असा संशय जावयाला निर्माण झाला होता. याच वादातून जावयानं सासऱ्याची हत्या करून त्यांचा मृतदेह शेतशिवारातील पुलाखालील पाईपमध्ये दडवून ठेवला.

किशोर कंगाले हे घरात दिसून आले नाहीत म्हणून कुटुंबीयांनी पोलीसात तक्रार केली. पोलिसांनी तक्रारीनुसार, तपासाची चक्रे वेगाने फिरवली. तपासाचा धागा किशोर कंगाले यांच्या जावयापर्यंत येऊन थांबला असता, पोलिसांनी त्याची सखोल चौकशी केली. चौकशी दरम्यान आरोपीने गुन्ह्याची कबुली दिली. या प्रकरणाचा छडा लावताना पोलिसांनी जावई अमित लांजेवारला नागपुरातून तर त्याचा मित्र योगेश पाठकला रामटेकमधून अटक केली आहे.