बीडमध्ये दिवसेंदिवस गुन्हेगारीच्या घटना वाढत चालल्या आहेत. मारहाण, हत्या, अपरहण यासारख्या गंभीर गुन्ह्यांच्या घटनेने बीड आधीच हादरले आहे. अशामध्ये बीडमध्ये पुन्हा एकदा गुंडाराजसारखी घटना समोर आली आहे. बीडच्या अंबाजोगाईमध्ये एका महिला वकिलाला अमानुषपणे मारहाण करण्यात आली आहे.

घरासमोरील गिरणी आणि लाऊड स्पीकर बंद करा यासंदर्भात महिला वकिलाने तक्रार केली होती. याचाच राग मनात धरून गावातील सरपंचासह १० पुरुषांनी हे धक्कादायक कृत्य केले. सेनगाव येथील महिला सरपंच आणि कार्यकर्त्यांकडून जेसीबीच्या पाईपने शेतामध्ये रिंगण करून वकिलाला अमानुष मारहाण करण्यात आली आहे. या घटनेमुळे पुन्हा एकदा बीड हादरले आहे.

मिळालेल्या माहितीनुसार, बीडच्या अंबाजोगाई तालुक्यातील सेनगाव येथील महिला सरपंच आणि त्यांच्या कार्यकर्त्यांकडून वकील महिलेला क्षुल्लक कारणावरून अमानुष मारहाण करण्यात आली आहे. ही महिला वकील अंबाजोगाई सत्र न्यायालयात कार्यरत आहे. महिला वकिलाने गावातील ध्वनिप्रदूषणामुळे मायग्रेनचा त्रास होत असल्याने आवाज कमी करावा, लाऊडस्पीकर लाऊ नयेत, घरापुढील पिठाच्या गिरण्या काढाव्यात याबाबत कार्यालयीन तक्रारी दिल्या होत्या.

तक्रार दिल्याचा राग आल्यामुळे गावातील महिला सरपंचाने आपल्या १० कार्यकर्त्यांच्या मदतीने वकिल महिलेला बेदम मारहाण केली. शेतात रिंगण करून काठ्या आणि जेसीबी पाईपने या सर्वांनी महिला वकिलाला जबर मारहाण केली. मारहाणीदरम्यान महिला वकील बेशुद्ध पडली. त्यानंतर तिला दवाखान्यात नेऊन एका रात्रीत उपचार करून घरी पाठवून दिलं. वकिल महिलेला मारहाण करणाऱ्यांविरोधात कठोर कारवाई करण्यात यावी अशी मागणी गावकऱ्यांकडून केली जात आहे.