भरत मोहोळकर, साम टिव्ही

अहिल्यानगर : लहानथोरांपासून सगळ्यांनाच हल्ली बर्थडे पार्टीचं आकर्षण असतं. पण याच बर्थडे पार्टीसाठी चक्क एका माणसाचा जीव गेलाय. होय, बर्थडे सेलिब्रेशनसाठी पैसे हवेत म्हणून एका व्यक्तिला धारधार चाकूनं भोसकून मारलंय. धक्कादायक बाब म्हणजे ही हत्या करणारे अल्पवयीन मुले आहेत. नशेच्या आहारी गेलेल्या सात मुलांनी सपासपा वार करुन गणेश चत्तर यांचा जीव घेतलाय. गणेश चत्तर यांचे अपहरण आणि खून नेमका कसा करण्यात आला?

चिमुरड्यांची सैतानी पार्टी

चत्तर यांनी राहता हद्दीत दुचाकीवरील तरुणांना लिफ्ट मागितली

तरुणांनी निर्जन स्थळी नेत लुटलं

मारहाण करत चाकू भोसकून हत्या

चत्तर यांच्या खिशातील मोबाइल चोरला

बर्थडे पार्टीसाठी 4500 रुपयांना मोबाईल विकला

पैसे हवेत म्हणून खून केल्याची आरोपींची कबुली

अल्पवयीन नशेखोर आरोपींनी वाढदिवसाच्या पार्टीसाठी निष्पाप व्यक्तीचा जीव घेतल्याने चत्तर कुटुंबियांवर दुःखाचा डोंगर कोसळला..गणेश चत्तर यांच्यामागे पत्ती आणि दोन मुले असा परीवार आहे. आमच्या माणसाची यात चुक काय? असाच सवाल कुटुंबियांनी उपस्थित केलाय. शिर्डीतील वाढती गुन्हेगारी पोलिस प्रशासना समोर मोठं आव्हान आहे. तीन महिन्यांपूर्वी शिर्डी संस्थानच्या दोन कर्मचाऱ्यांची पहाटे हत्या झाली होती. त्यानंतर आता अल्पवयीन मुलांच्या या सैतानी कृत्यानं राज्यात खळबळ उडाली आहे. त्यात अल्पवयीन मुलांमध्ये वाढणाऱ्या अंमली पदार्थ सेवनाचा धोकाही पुन्हा अधोरेखित झालाय. या नशेखोर प्रवृत्तीला कसा आळा घातला जाणार? आणि साईनगरीतील गुन्हेगारी हद्दपार कधी होणार ? हा खरा सवाल आहे.