प्रत्येकाची काही न काही स्वप्ने असतात. आपली स्वप्ने पूर्ण करण्यासाठी खूप मेहनत घ्यायची असते. मेहनत आणि इच्छाशक्तीच्या जोरावर तुम्ही खूप यशस्वी होऊ शकतात. त्यासाठी तुम्हाला सातत्य ठेवायला लागते. असंच सातत्य अंशिका जैन यांनी ठेवलं आणि यूपीएससी परीक्षा पास केली. आज त्या आयपीएस अधिकारी म्हणून कार्यरत आहेत.

अंशिका जैन ५ वर्षांच्या असतानाच त्यांच्या आईवडिलांचे दुःखद निधन झाले. आई वडिलांशिवाय त्या लहानाच्या मोठ्या झाल्या. त्यांच्या आजीने आणि काकाने त्यांचे पालनपोषण केले. त्यांची आजी शिक्षिका होत्या.त्या नेहमी सांगायच्या की, शिक्षण हीच खरी संपत्ती आहे. त्यांच्या आजीनेच त्यांना सिविल सर्व्हिसमध्ये काम करण्यासाठी प्रेरणा दिली.

यूपीएससीसाठी नोकरी सोडली (UPSC Success Story)

अंशिका या मूळच्या दिल्लीच्या रहिवासी. त्यांनी सुरुवातीचे शिक्षण दिल्ली युनिव्हर्सिटीमधून पूर्ण केले. त्यांनी बी.कॉम डिग्री प्राप्त केली. त्यानंतर त्यांनी एम.कॉम केले. शिक्षण पूर्ण झाल्यानंतर त्यांना चांगल्या कंपनी नोकरी मिळाली होती परंतु त्यांनी ही नोकरी सोडली. त्यांनी यूपीएससी परीक्षेची तयारी केली.

यूपीएससी परीक्षेची तयारी करत असतानाच २०१९ मध्ये त्यांच्यावर दुःखाचा डोंगर कोसळला. त्यांच्या आजीचे दुःखद निधन झाले. यामुळे त्या पूर्ण खचल्या होत्या. परंतु त्यांनी तरीही हार मानली नाही. आजीचे स्वप्न पूर्ण करण्यासाठी त्यांनी पुन्हा परीक्षेचा अभ्यास सुरु केला.

अंशिका यांच्यासाठी हा प्रवास सोपा नव्हता. त्यांना सलग ५ वेळा अपयश आले होते. त्यानंतर त्यांनी आपल्या अभ्यासाची स्ट्रॅटेजी बदलली. त्यांनी २०२२ मध्ये सहाव्या प्रयत्नात यश मिळवले. त्यांनी यूपीएससीत ३०६ रँक प्राप्त केली. त्यांचा हा प्रवास सर्वांसाठीच प्रेरणादायी आहे.