नवी दिल्ली : भारतीय रिझर्व्ह बँकेने चलनविषयक धोरणाच्या बैठकीनंतर रेपो दराबाबत घोषणा केली. एकीकडे रेपो दराची घोषणा होताच शेअर बाजार धाडकन कोसळले आहे. गुरुवारी चलनविषयक धोरणाच्या बैठकीनंतर रेपो दर 'जैसे थे' राहणार असल्याने सेन्सेक्स आणि निफ्टी गडगडला. रिझर्व्ह बँकेचे गर्व्हनर शक्तिकांत दास यांनी नवव्यांदा रेपो दरात बदल केले नाही. रेपो दराची घोषणा झाल्यानंतर सेन्सेक्स ५०० अंकांनी आपटला. तर नॅशनल स्टॉक एक्सचेंजचा निफ्टी १५० अंकांनी घसरला.

आरबीआयने घोषणा करत सेन्सेक्स-निफ्टी गडगडला

आठड्याच्या चौथ्या दिवशी बीएसई सेन्सेक्सचा ७९,४२०.४९ अंकावर व्यवहार सुरु झाला होता. सकाळी १०.१० वाजताच्या सुमारास सेन्सेक्स ५०९.६९ अंकांनी म्हणजे ०.६४ टक्क्यांनी घसरून ७८,९५८.३२ वर आला. सेन्सेक्ससारखा एनएसई निफ्टी देखील घसरला. निफ्टीचा २४,१४९.४५ वर व्यवहार होत आहे.

कोणते शेअर्स कोसळले?

शेअर बाजार अचानक मोठी घसरण पाहायला मिळाली. लार्जकॅप कंपन्यामधील सामील असलेल्या Infy शेअर २.०१ टक्के, पॉवरग्रिड शेअर १.९० टक्के, एल अँड टी शेअर १.५० टक्क्यांनी घसरला. मिडकॅप कंपन्यांमध्ये सामील ABFRL शेअर २.९३ टक्के, पीइएल शेअर २.५८ टक्के, पॉलिसी बाजार २.५० टक्क्यांनी घसरला. स्मॉलकॅप कंपन्यामध्ये सामील असलेला Fusion शेअर ८.७५ टक्के,SPLशेअर ६.७६ टक्के, omaxe शेअर ५ टक्के आणि लेमन ट्री शेअर ४.७० टक्क्यांनी घसरला.

बुधवारी शेअर बाजारात दिसली तेजी

शेअर बाजारात बुधवारी जोरदार तेजी पाहायला मिळाली होती. सेन्सेक्स सकाळी ९.१५ वाजता ७९,५६५.४० वर सुरु झाला होता . दिवसभराच्या व्यवहारात १००० अंकांनी उसळी घेत ७९,६३९.२० वर पोहोचला होता. शेअर बाजार बंद बंद होता सेन्सेक्सची गती कमी होत गेली. मात्र, सेन्सेक्स ८७४.९४ अंकांनी म्हणजे १.११ टक्क्यांनी वधारून ७९,४६८.०१ वर बंद झाला.

दुसरीकडे एनएसई निफ्टीचा २४,२८९.४० वर व्यवहार सुरु होता. त्यानंतर रॉकेट गतीने २४,३३७.८ वर पोहोचला होता. निफ्टी-५० ३०४.९५ अंकांनी उसळी घेऊन २४,२९७.५० वर बंद झाला.