इराण-इस्त्रायल युद्धाचा परिणाम जगावर होताना दिसत आहे. याचाच फटका आता सर्वसामान्यांना बसला आहे. एलपीजी गॅसच्या किंमतीत वाढ झाली आहे. युद्धामुळे गॅस पुरवठा खंडीत झाला आहे. त्यानंतर गो गॅसने नागपूरमध्ये आपल्या LPG स्टेशनवर वाहनांत लागणाऱ्या एलपीजी गॅसच्या दरात प्रति लिटर 8 रुपये 42 पैशांनी दरात वाढ केली आहे. एलपीजी गॅसच्या किंमतीत वाढ झाल्याने आता वाहनधारकांच्या खिशाला फटका बसणार आहे.

आज नागपूरमध्ये (Nagpur LPG Gas Price) एलपीजी गॅसच्या किंमती ६४ रुपये ९८ पैसे झाले आहेत. स्कूल बस व स्कूल व्हॅनला गो गॅस 12 रुपये प्रति लिटर सबसिडी दराने LPG गॅस पुरवत होते . आता ही सबसिडी बंद केली आहे. त्यामुळे स्कूल बस आणि स्कूल व्हॅनसाठी हे दर ही थेट 20 रुपयांनी वाढले आहे.

अनेक ऑटो रिक्षा हे नागपुरात एलपीजीवर चालतात. त्यामुळे यांनादेखील फटका बसणार आहे. कुठेतरी भाडेवाढ होईल, अशी अपेक्षा रिक्षाचालकांना होती. त्यातच आता एलपीजी गॅसच्या किंमती वाढल्याने सर्वसामान्यांना खिशाला फटका बसणार आहे. (Nagpur Go Gas LPG price Hike)

अनेक वाहने, रिक्षा, बस या एलपीजी गॅसवर चालतात. या वाहनांची संख्या वाढत आहे. वाहनात भरणारा एलपीजी गॅस हा सर्वसामान्यांच्या खिशाला परवडणारा होता. मात्र, आता या किंमतीतदेखील वाढ झाल्याने थेट सर्वांनाच फटका बसणार आहे. रिक्षा, बस, कारने रोज प्रवास करणाऱ्यांवर याचा जास्त प्रमाणात परिणाम होणार आहे. जर इराण-इस्त्रायल युद्ध असेच सुरु राहिले तर या किंमती अजूनच वाढण्याची शक्यता वर्तवली जात आहे.