LPG Price Today : मागील १० दिवसात पेट्रोल आणि डिझेलच्या किंमतीमध्ये ४ वेळा वाढ झाली आहे, तर आज सकाळी सीएनजीच्या (CNG) किंमतीमध्येही वाढ करण्यात आली आहे. मे महिन्याच्या सुरूवातीलाच व्यावसायिक (Commercial) गॅस सिलिंडरच्या दरात जवळपास १ हजार रूपयांची वाढ करण्यात आली. या दरवाढीमुळे देशभरात महागाईचा भडका उडाला आहे. ताटातील जेवणापासून ते प्रवास आणि इतर सर्वच ठिकाणी किंमतीत मोठी वाढ नोंदवण्यात आली. त्यामुळे घरगुती गॅस सिलिंडरचे (Domestic LPG Cylinder) दरही वाढतील, अशी भीती सर्वसामान्यांच्या मनात आहे. आज गॅस सिलिंडरच्या दरात वाढ झाली का? याबाबत जाणून घेऊयात.. (Domestic gas cylinder rate)

सरकारी तेल कंपन्यांनी मागील १० दिवसांत पेट्रोल आणि डिझेलच्या दरात चार वेळा वाढ केली. मात्र, एलपीजी सिलेंडरच्या दरात आज कोणताही बदल झालेला नाही. मंगळवारी एलपीजी सिलेंडरच्या दरात कोणताही बदल झालेला नाही. सोमवारीच तेल कंपन्यांनी पुन्हा पेट्रोल आणि डिझेलच्या दरात वाढ केली होती. महाराष्ट्रात पेट्रोलचे दर प्रति लिटर ११० रूपयांवर पोहचले आहेत.

घरगुती सिलेंडरचा सध्याचा दर काय आहे?

राजधानी दिल्लीत १४.२ किलोग्रॅमच्या घरगुती सिलेंडरची किंमत ₹९१३ इतकी आहे. तर आर्थिक राजधानी मुंबईत ₹९१२.५० आणि कोलकातामध्ये ₹९३९ इतकी किंमत आहे. चेन्नईमध्ये आज घरगुती सिलेंडरची किंमत ₹९२८.५० आहे. आंतरराष्ट्रीय बाजारात घरगुती सिलेंडरच्या पुरवठ्यात व्यत्यय येत आहेच. पण तरीही अनेक दिवसांपासून सिलिंडरचे दर स्थिर आहेत. आखाती देशातील तणावामुळे भारतासारख्या अनेक देशांमध्ये इंधनाचे संकट तयार झाले आहे.

घरगुती गॅसच्या दरात वाढ होणार का?

इराण-इस्त्राइल-अमेरिका यांच्यात युद्ध सुरू झाल्यानंतर याचा परिणाम जगावर पडला. अनेक देशांचा इंधनाचा पुरवठा विस्कळीत झाला. त्यातच क्रूड ऑइलच्या किंमतीमध्येही वाढ नोंदवण्यात आली. देशातील इंधनाच्या दरात मोठी वाढ झाली. व्यावसायिक सिलिंडरच्या दरात तब्बल ४७ टक्क्यांची वाढ केली, मुंबईमध्ये सध्या व्यावसायिक गॅस सिलिंडरची किंमत ३०२४ इतकी आहे.

दरम्यान, घरगुती सिलेंडरच्या दरात शेवटची वाढ ६० रुपयांची झाली होती. मात्र त्यानंतर दर स्थिर राहिले आहेत. आता हे दर किती काळ स्थिर राहतील हे पाहणे महत्त्वाचे आहे. सध्याच्या परिस्थितीत, किमती न वाढवल्यामुळे कंपन्यांना प्रचंड तोटा होत असल्याचे सांगण्यात येत आहे. त्यामुळे भविष्यात घरगुती गॅस सिलिंडरच्या दरात ५० ते १०० रूपयांची वाढ होऊ शकते, असे सांगण्यात येतेय.