मुख्यमंत्री माझी लाडकी बहीण योजनेचा लाभ आत्तापर्यंत सर्व लाभार्थी महिलांना देण्यात आला होता. नुकताच जून महिन्याचा हप्ता लाडकीच्या खात्यात जमा झाला आहे. मात्र त्यामध्ये काही महिलांना योजनेचा लाभ मिळालाच नाही. यामागचं कारण समोर आलं आहे.

लाडकी बहीण योजनेअंतर्गत (Ladki Bahin Yojana) जून महिन्याचा हप्ता १५ जुलैपासून पात्र महिलांच्या खात्यात जमा व्हायला सुरूवात झाली. या योजनेचा लाभ राज्यातल्या लाखो महिला घेतात. त्यांना दर महिना १,५०० रुपयांची आर्थिक मदत दिली जाते. पण या महिन्यात एकूण ९२ लाख महिलांची नावं योजनेतून वगळल्याची चर्चा सुरू झाली होती. काँग्रेसचे नेते विजय वडेट्टीवार यांनी असा दावा केला. यानंतर अनेक लाभार्थी महिलांमध्ये संभ्रमाचे वातावरण निर्माण झाले.

दरम्यान, महिला व बालविकास मंत्री आदिती तटकरे यांनी हा दावा फेटाळून लावला आहे. त्यांनी सांगितलं की, ९२ लाख महिलांची नावं एकाच वेळी वगळण्यात आलेली नाहीत. सध्या राज्यात ई-केवायसी पूर्ण केलेल्या १.६७ ते १.७० कोटी पात्र महिलांना नियमितपणे योजनेचा लाभ दिला जातो.

सरकारकडून लाभार्थ्यांची सातत्याने पडताळणी केली जाते आहे. या पडताळणीत ई-केवायसी न केलेल्या, उत्पन्न मर्यादेपेक्षा जास्त उत्पन्न असलेल्या, सरकारी सेवेत असलेल्या तसेच अपात्र ठरणाऱ्या अर्जदारांची नावे योजनेतून वगळली गेली आहेत. काही प्रकरणांमध्ये पुरुषांनीही या योजनेचा लाभ घेण्याचा प्रयत्न केल्याचे समोर आले आहे. अशा अर्जांवरही कारवाई करण्यात आली आहे.