अमेरिकेचे राष्ट्राध्यक्ष डोनाल्ड ट्रम्प यांनी भारतातून अमेरिकेत जाणाऱ्या वस्तूंवर २५ टक्के कर लावण्याची घोषणा केली आहे. भारत अमेरिकेचा मित्र असला तरी त्यावर २५ टक्के कर लावला जाईल. यासोबतच, रशियन लष्करी उपकरणे आणि तेल खरेदी करण्यासाठी दंडही लावला जाईल, असेही डोनाल्ड ट्रम्प म्हणालेत. भारतावर टॅरिफ लावत असल्याची घोषणा करताना डोनाल्ड ट्रम्प यांनी धमकी देणारी भाषा केली. दरम्यान भारत आणि रशियाच्या मैत्री अमेरिकाला खटकलीय. भारत गेल्या काही दिवसांपासून रशियाकडून मोठ्या प्रमाणात कच्चे तेल खरेदी करत होता. त्यामुळे अमेरिकेनं भारतावर २५ टक्के टॅरिफ लावलाय.

भारतातून कापडाची सर्वात जास्त निर्यात होते. अमेरिका अनेक कपडे आणि पादत्राणे भारताकडून खरेदी करते. टॅरिफ लागू झाल्यावर अमेरिकन बाजारपेठेत या वस्तू महाग होतील. त्यामुळे परिणामी भारतीय कंपन्यांच्या ऑर्डर आणि शिपमेंटवर परिणाम होईल आणि निर्यात कमी होईल. त्याचबरोबर भारत हा जगातील सर्वात जास्त हिरा निर्यात करणारा देश आहे. अमेरिकेत मोठ्या प्रमाणात दागिने आणि हिऱ्याची निर्यात होते.

भारत अमेरिकेला ऑटोमोबाईल आणि ऑटो पार्ट्सची निर्यात करते. त्यामुळे १ ऑगस्टपासून या पार्ट्सच्या किंमती वाढू शकतात. याचबरोबर भारत दरवर्षी १४ अब्ज डॉलर्सच्या किंमतीचे मोबाईल आणि इलेक्ट्रॉनिक्स उत्पादनाची निर्यात करत असतो. अमेरिकेच्या टॅरिफ करामुळे हे दर वाढतील.