Maharashtra Jalgaon Gold Market Update मध्यपूर्वेतील वाढत्या ताणतणावाची झळ भारताला देखील लागली आहे. यामुळे इंधन दरवाढीसोबतच आता सोने चांदीवर देखील त्याचा परिणाम पाहायला मिळत आहे. सुवर्णनगरी म्हणून ओळखल्या जाणाऱ्या जळगावातील सराफा बाजार उघडताच सोने चांदीच्या दरात मोठा बदल पाहायला मिळाला. काही दिवसांपासून घसरलेल्या सोन्या चांदीच्या दरात मोठी वाढ झाली आहे. सोने दहा ग्रॅममागे १,५०० रुपयांनी वाढले असून चांदीच्या दरात प्रतिकिलो ४,००० रुपयांची उसळी पाहायला मिळाली आहे. दरम्यान सण उत्सवाच्या काळात सोने चांदीचे दर वाढल्याने खरेदीदारांवर संकट कोसळलं आहे.

आजचे सोने चांदीचे ताजे दर

सराफा व्यावसायिकांच्या माहितीनुसार, दोन दिवसांपूर्वी घसरलेले दर आज पुन्हा वाढले आहेत.जळगावच्या सराफा बाजारात आज सोन्याची किंमत प्रति दहा ग्रॅम १, ५१,००० रूपयांवर पोहचले आहे. तर दुसरीकडे चांदीच्या दरामध्ये ४ हजारांनी वाढ झाली असून आजचे ताजे दर प्रतिकिलो २, ४९,००० रूपयांवर पोहचले आहे. वाढत्या महागाईमुळे नागरिकांच्या खिशाला कात्री लागली आहे.

सोने चांदीचे दर सतत का बदलतात?

आंतरराष्ट्रीय पातळीवरील आर्थिक अनिश्चितता आणि सुरक्षित गुंतवणुकीसाठी वाढलेली मागणी यामुळे सोन्या-चांदीच्या दरांमध्ये अस्थिरता कायम राहू शकते. येत्या काळातही जागतिक बाजारातील घडामोडींवर अवलंबून दरांमध्ये चढ-उतार सुरू राहण्याची शक्यता व्यक्त केली जात आहे. परिणामी, दररोजच्या चढ-उतारामुळे ग्राहकांमध्ये संभ्रमाचे वातावरण निर्माण झाले आहे. विशेषतः लग्नसराईचा हंगाम पुन्हा सुरू होत असल्याने दागिने खरेदीचा विचार करणाऱ्या नागरिकांसाठी हा दरवाढीचा फटका मानला जात आहे.

सोमवारचे सोने चांदीचे दर

जळगावच्या सराफा बाजारात सोमवारी ८ जून रोजी सोन्याचे दर प्रतिदहा ग्रॅम (विनाजीएसटी) १, ४९, ५०० इतकी होती. तर चांदीचे दर प्रतिकिलो (विनाजीएसटी) २, ४५,००० इतकी होती. अमेरिका इराण मधील युद्धाचा हा परिणाम असल्याचे तज्ज्ञांचे म्हणणे असून पुढील काही दिवसांमध्ये हे दर कसे राहणार याकडे गुंतवणूकदार आणि खरेदीदारांचे लक्ष लागले आहे.