गेल्या वर्षीच ट्विटरमध्ये एलन मस्क यांनी मोठा बदल केला होता. ट्विटरला एक्स असं नाव देण्यात आलं. त्यानंतर आता त्यांनी यामध्ये आणखी एक मोठा बदल केला आहे. ट्विटर अकाउंटची युआरएल देखील बदलण्यात आली आहे.

एलन मस्क यांनी एक्स अकाउंटवर तयार होणारी URL बदलली आहे. आता येथील सर्व URLमध्ये x.com दिसणार आहे. या आधी Twitter.com असं URL मध्ये येत होतं. मात्र आता एक्स अकाउंटवर ट्विटरचं पूर्ण नामोनिशाण मिटलं आहे, असं म्हणायला हरकत नाही.

ट्विटरची जबाबदारी एलन मस्क यांच्यावर आल्यानंतर त्यांनी आतापर्यंत यामध्ये अनेक बदल केले आहेत.आताही त्यांनी आपल्या एक्स अकाऊंटवर एक पोस्ट शेअर करत URL बद्दल माहिती देण्यात आली आहे.

आपल्या ट्विटरमध्ये एलन मस्क यांनी लिहिलं आहे की, "आम्ही कंपनीची URL बदलली आहे. मात्र या बदलामुळे तुमच्या माहितीला कोणताही धोका नाही. तुमचा डेटा आणि प्रायव्हसीमध्ये कंपनीने काहीही बदल केलेला नाही. प्रायव्हसीशी संबंधित असलेले सर्व फिचर्स आहेत तसेच आहेत. " यासह एक लिंक शेअर करत त्यावर युजर्स त्यांची प्रायव्हसी सेटींग तपासू शकतात.

साल २०२२ पासून ट्विटरमधील बदलांना सुरुवात झाली. एलन मस्क यांनी याच वर्षी ४४ अरब डॉलर देत हे अॅप खरेदी केलं. त्यानंतर त्यांनी ट्विटरचं नाव बदललं. तसेच सर्वांच्या आठवणीची निळी चिमणी असलेला लोगो बदलला. त्यानंतर सब्सकक्रिप्शनची सुरुवात केली. या सर्वात आता URL देखील बदलली आहे. आता जुन्या ट्विटर प्रमाणे फक्त आकाशी रंग लोगोला आणि साईटला आहे.