दिवाळी म्हटलं की घरात रोषणाई, फटाक्यांची आतषबाजी आणि आनंदाचं वातावरण असतं. मात्र, या आनंदाच्या सणात एखादी छोटीशी चूक मोठ्या अपघाताला कारणीभूत ठरू शकते. फटाके फोडताना भाजणे, दिव्यामुळे आग लागणे किंवा इतर दुर्घटना घडण्याच्या घटना अनेकदा समोर येतात. अशा वेळी केवळ शारीरिक त्रासच नाही, तर उपचारांचा खर्चही कुटुंबासाठी चिंतेचा विषय ठरतो. अशा परिस्थितीत तुम्हाला फटाका विमा उपयोगी पडू शकतो.कसा मिळवायचा हा विमा ? जाणून घ्या सविस्तर माहिती.

काय आहे फटाका विमा?

फटाका विमा हा दिवाळीच्या काळात होणाऱ्या अपघातांसाठी तयार केलेला विमा आहे. विशेष म्हणजे हा विमा अगदी 10 रुपयांपासून उपलब्ध असल्याचा दावा काही कंपन्या करतात. मात्र, त्याची किंमत आणि संरक्षण पॉलिसीनुसार वेगवेगळे असू शकते. या विम्याचा कालावधी साधारण 10 ते 30 दिवसांपर्यंत असतो.

अपघात झाल्यास किती पैसे मिळतात?

फटाके किंवा दिव्यांमुळे एखादी व्यक्ती भाजली किंवा जखमी झाली आणि तिला 24 तासांपेक्षा जास्त काळ रुग्णालयात दाखल करावे लागले, तर पॉलिसीच्या अटींनुसार उपचारांसाठी आर्थिक मदत मिळू शकते. काही योजनांमध्ये 10 हजार ते 25 हजार रुपयांपर्यंत वैद्यकीय संरक्षण दिले जाते.गंभीर अपघातात विमाधारकाचा मृत्यू झाल्यास किंवा हात, पाय अथवा डोळ्यांना कायमस्वरूपी गंभीर दुखापत झाल्यास ठरलेली रक्कम दिली जाऊ शकते. काही योजनांमध्ये कुटुंबातील इतर सदस्यांनाही संरक्षण मिळते.

घर आणि गाडीचे नुकसान झाल्यास ?

फटाका विमा घेतल्याने घर, फ्लॅट किंवा गाडीच्या नुकसानीची भरपाई मिळत नाही. अशा नुकसानीसाठी होम इन्शुरन्स किंवा मोटर इन्शुरन्सची गरज असते. घरातील फर्निचर, टीव्ही, फ्रिज यांसारख्या वस्तूंचे संरक्षण पॉलिसीत समाविष्ट आहे का, हे तपासणे महत्त्वाचे आहे.

विमा घेण्यापूर्वी या गोष्टी तपासा

PhonePe, CoverSure आणि Bajaj Finserv यांसारख्या प्लॅटफॉर्मवर अशा प्रकारच्या विमा योजना उपलब्ध असू शकतात. मात्र, विमा घेण्यापूर्वी त्याच्या अटी, कव्हरेज आणि कालावधी नीट समजून घ्या. तुमच्याकडे आधीच पुरेसा हेल्थ इन्शुरन्स आणि पर्सनल ॲक्सिडेंट विमा असेल, तर वेगळा फटाका विमा घेण्याची गरज कदाचित भासणार नाही. अपघातापासून बचावासाठी काळजी घेण्यासोबतच योग्य विमा संरक्षण असणेही महत्त्वाचे आहे.