तुमचं आधार कार्ड आता गुगलशी लिंक होणार! होय, तुम्ही वाचताय ते अगदी खरं आहे. डिजिटल व्यवहारांना चालना देण्यासाठी गूगलने भारतात एक महत्त्वाचे पाऊल उचलले आहे. गूगल वॉलेटच्या माध्यमातून आता आधार-आधारित डिजिटल आयडी सपोर्ट सुरू करण्यात आला आहे. या नव्या सुविधेमुळे यूझर्सना आपली आधार माहिती सुरक्षितपणे मोबाईलमध्ये स्टोअर करता येणार असून, फिजिकल आधार कार्ड सोबत घेऊन फिरण्याची गरज भासणार नाही.

ही सुविधा यूनिक आयडेंटिफिकेशन अथॉरिटी ऑफ इंडिया (UIDAI) च्या सहकार्याने विकसित करण्यात आली आहे. गूगल वॉलेटमध्ये आधार जोडल्यावर यूझर्सना आपली ओळख सुरक्षित आणि नियंत्रित पद्धतीने वापरता येणार आहे. या फीचरची सर्वात खास बाब म्हणजे, ओळखपत्रासाठी संपूर्ण आधार कार्ड न दाखवता केवळ आवश्यक माहिती देणे शक्य होते. 

या प्रणालीमध्ये ‘व्हेरिफायबल क्रेडेंशियल’ मॉडेलचा वापर करण्यात आला आहे. सोप्या भाषेत सांगायचे झाल्यास, एखाद्या ठिकाणी वयाचा पुरावा द्यायचा असल्यास फक्त वयाशी संबंधित माहितीच शेअर करता येईल. त्यामुळे आधार क्रमांक किंवा इतर संवेदनशील माहिती सुरक्षित राहते. यामुळे यूझर्सची खासगी माहितीचे संरक्षण अधिक प्रभावीपणे होते.

गूगलच्या माहितीनुसार, हे फीचर जागतिक सुरक्षा मानकांवर आधारित असून, ‘सेलेक्टिव्ह डिस्क्लोजर’ सारखी सुविधा यात देण्यात आली आहे. म्हणजेच यूझर स्वतः ठरवू शकतो की कोणती माहिती कोणासोबत शेअर करायची आहे. या डिजिटल आयडीचा वापर विविध सेवांमध्ये करता येणार आहे. उदाहरणार्थ, PVR INOX मध्ये चित्रपट पाहताना ओळख पडताळणी, Bharat Matrimony वर प्रोफाइल व्हेरिफिकेशन, Atlys वर व्हिसा अर्ज भरणे किंवा MyGate वर व्हिजिटर व्हेरिफिकेशन यांसारखी ऑनलाईन कामे अधिक सोपी आणि जलद होणार आहेत.

गूगलने पुढे सांगितले की, भविष्यात आणखी अनेक सेवा या प्रणालीला स्वीकारतील. भारताबरोबरच सिंगापूर, तैवान आणि ब्राझिलसारख्या देशांमध्येही डिजिटल आयडी फीचर विस्तारले जात आहे. या उपक्रमामुळे डिजिटल ओळख अधिक सुरक्षित, सोपी आणि विश्वासार्ह बनण्याची अपेक्षा आहे.