आधार कार्ड हे आजच्या काळातील सर्वात महत्त्वाच्या कागदपत्रांपैकी एक आहे. केवळ ओळखीचा पुरावा म्हणून वापरले जात नाही तर शासकीय आणि बँकेच्या कामसाठी आधार कार्ड वापरले जाते. मोबाईल सिम घ्यायचे असेल तर तुमच्याकडे आधार कार्ड असणं आवश्यक आहे. पण एका आधार कार्डावर किती सिम कार्ड खरेदी करता येतात, याची तुम्हाला माहिती आहे का? काय आहे याचा नियम? जर तुम्ही या मर्यादेपेक्षा जास्त सिम कार्ड खरेदी केले तर तुम्हाला कायदेशीर अडचणींना सामोरे जावे लागू शकते.

भारत सरकारच्या मार्गदर्शक तत्त्वांनुसार, एका आधार कार्डवर जास्तीत जास्त ९ सिम कार्ड खरेदी करता येऊ शकतात. मशीन टू मशीन (M2M) सेवांसाठी ही संख्या १८ पर्यंत वाढू शकते. M2M सेवा विशेषतः कनेक्टिंग डिव्हाइसेससाठी आहेत. जर तुम्ही ९ पेक्षा जास्त सिम कार्ड खरेदी केले किंवा योग्य कारणाशिवाय त्यांचा वापर केला तर तुम्हाला खालील समस्यांना सामोरे जावे लागू शकते. तुमची ओळख संरक्षित करण्यासाठी अतिरिक्त सिम कार्ड ब्लॉक केले जाऊ शकतात.

अनेक सिम कार्डचा गैरवापर केल्याने सायबर फसवणूक किंवा इतर बेकायदेशीर कृत्य होऊ शकतात, ज्यामुळे तुम्ही जबाबदार असाल. तुमच्या नावावर रजिस्टर्ड सिम कार्ड कोणत्याही बेकायदेशीर क्रियाकलापासाठी वापरले गेले तर कायदेशीर होऊ शकते. ट्राय आणि दूरसंचार विभाग वेळोवेळी सिम कार्ड यूझर्सची तपासणी करतात. जर तुमच्या आधार कार्डवरील सिम कार्डची संख्या मर्यादेपेक्षा जास्त आढळली तर तुम्हाला नोटीस येऊ शकते.

तुमच्या नावावर किती सिम कार्ड आहेत, हे जाणून घेण्यासाठी TAFCOP पोर्टलवरून तुम्ही तपासू शकतात. TAFCOP वेबसाइटला भेट द्या. त्यानंतर तुमचा मोबाईल नंबर एंटर करा. OTP व्हेरिफिकेशननंतर, तुमच्या नावावर नोंदणीकृत सर्व सिम कार्डची यादी तुमच्या समोर येईल.