केंद्रीय कर्मचारी आणि पेन्शनधारकांसाठी दिलासादायक बातमी समोर आली आहे. आता आठवा वेतन आयोग लागू करण्याच्या उद्देशाने महत्त्वाची पाऊले उचलली जात आहे. आता आठव्या वेतन आयोगासाठी तीन दिवसीय महत्त्वपूर्ण बैठक आयोजित करण्यात आली आहे. कालपासून या बैठकीला सुरुवात झाली आहे. ही बैठक दिल्लीत होत आहे. उपसचिव अभय एन. सहाय यांनी दिलेल्या माहितीनुसार, २८ ते ३० एप्रिलदरम्यान होणाऱ्या बैठकीत फिटमेंट फॅक्टर आणि बेसिक सॅलरी या मुद्द्यांवर चर्चा होणार आहे.

तुमचा पगार किती वाढेल?

दिल्लीतील या बैठकीत कर्मचारी संघटना आणि युनियनच्या प्रतिनिधींना आमंत्रित करण्यात आले आहे. या बैठकीत ३ महत्त्वाच्या मुद्द्यांवर चर्चा होणार आहे.

फिटमेंट फॅक्टर- कर्मचारी संघटनांनी फिटमेंट फॅक्टरमध्ये वाढ करण्याची मागणी केली आहे. सध्या फिटमेंट फॅक्टर २.५७ आहे. हा फिटमेंट फॅक्टर ३.२५ किंवा त्यापेक्षा जास्त करण्याची मागणी केली जात आहे.

बेसिक सॅलरी- फिटमेंट फॅक्टरवर मंजुरी मिळाल्यानंतर कर्मचाऱ्यांच्या बेसिक सॅलरीत वाढ होईल.

निवृत्तीवेतन आणि भत्ते- निवृत्त कर्मचाऱ्यांच्या पेन्शन आणि महागाई भत्ता आणि इतर भत्त्यांबाबत शिफारसीदेखील तयार केल्या जातील.

आयोगाकडे १८ महिन्यांचा वेळ

सरकारने ३ नोव्हेंबर २०२५ रोजी आठव्या वेतन आयोगाच्या स्थापनेला मंजुरी दिली. अर्थ मंत्रालयाचे राज्य मंत्री पंकज चौधरी यांच्या म्हणण्यांनुसार, आयोगाकडे अंतिम अहवाल सादर करण्यासाठी १८ महिन्यांचा कालावधी आहे. सध्या आयोग राज्यांचा दौरा करत असून संबंधित घटकांकडून माहिती गोळा करत आहे. १२ मार्च रोजी झालेल्या बैठकीनंतर ही तीन दिवसीय बैठक खूप महत्त्वाची मानली जातेय. या बैठकीत संयुक्त सांमजस्य कराराला अंतिम स्वरुप दिले जाऊ शकते.