सरकारी कर्मचारी आठव्या वेतन आयोगाची वाट पाहत आहे. आठव्या वेतन आयोगाबाबत महत्त्वाची अपडेट समोर आली आहे. नॅशनल काउंसिलच्या स्टाफ साइडने आयोगाला ५१ पानांचे निवेदन आयोगाला पाठवले आहे. जेसीएम सचिव शिव गोपाल मिश्रा यांनी एक्स प्लॅटफॉर्मवर माहिती दिली आहे. त्यांनी सांगितले की, कर्मचाऱ्यांच्या गरजा आणि वाढती महागाई लक्षात घेऊन महत्त्वाचे प्रस्ताव देण्यात आले आहेत.

फिटमेंट फॅक्टरची मागणी (8th Pay Commission Fitment Factor Update)

शिव गोपाल मिश्रा यांनी पोस्टमध्ये लिहलंय की, सर्वात मोठी प्रस्ताव हा फिटमेंट फॅक्टरबाबत आहे. यावेळी ३.८३ फिटमेंट फॅक्टर सुचवण्यात आला आहे. या आधारावर सध्याचा मूळ पगार १८,००० रुपयांवरुन ६९,००० पर्यंत वाढवण्याचा प्रस्ताव आहे. कमाल पगार २,१५,००० रुपयांपर्यंत वाढवण्याचेही सांगण्यात आले आहे. जर आठव्या वेतन आयोगाने हा प्रस्ताव स्विकारला तर कर्मचाऱ्यांच्या पगारात चांगलीच वाढ होऊ शकते.

फॅमिली युनिटबाबतही प्रस्ताव (8th Pay Commission Family Unit )

आठव्या वेतन आयोगात फॅमिली युनिटमध्येही बदल करण्याती मागणी करण्यात आली आहे. फॅमिली युनिट ५ सदस्यांपर्यंत वाढवण्याचा प्रस्ताव आहे. पालकांचा फॅमिली युनिटमध्ये समावेश करण्याचा प्रस्ताव आहे. जेणेकरुन कर्मचाऱ्यांना खर्चासाठी कोणतीही अडचण येणार नाही.

वार्षिक पगारवाढीबाबत सूचना ( 8th Pay Commission Annual Increment)

वार्षिक पगारवाढीमध्येही मोठा बदल करण्याचा प्रस्ताव आहे. वार्षिक इंक्रिमेंट ३ टक्क्यांवरुन ६ टक्के करण्याची मागणी करण्यात आली आहे. यामुळे कर्मचाऱ्याचंा पगार चांगला वाढेल.

वेतनश्रेणीत बदल

वेतनश्रेणीत बदल करण्याचा प्रस्ताव ठेवण्यात आला आहे. सध्याची लेव्हल २ आणि ३ वेतनश्रेणी एकत्र करुन नवीन वेतनश्रेणी तयार करण्याचा प्रस्ताव आहे. तसेच लेव्हल ४ आणि ५, ७ आणि ८, ९ आणि १०चेही विलीनीकरण करण्याचा प्रस्ताव आहे. यामुळे वेतनरचना कमी होऊन कर्मचाऱ्यांना फायदा होईल.