मयुरेश कडव 

वांगणी (ठाणे) : कोरोना काळात लोकडाऊन लागल्याने अनेकांचे नुकसान झाले. तर काहींचे आयुष्य उध्वस्त झाले आहे. मात्र याच काळात ठाणे जिल्ह्यातल्या वांगणी जवळील डोणे गावात राहणाऱ्या तरुणाच्या आयुष्याला कलाटणी मिळाली आहे. संदेश सारंगा या तरुण शेतकऱ्यानं चक्क युट्युब पाहून एक एकरात चाफ्याची बाग फुलवली. या बागेतून आता त्याला महिन्याकाठी ३० ते ३५ हजारांचं उत्पन्न मिळत आहे.

ठाणे जिल्ह्यातील वांगणी येथील युवा शेतकरी संदेश सारंगा यांनं कोरोना काळात शेती करण्याचा निर्णय घेतला. यासाठी त्याने युट्युबवर नवनवीन व्हिडिओ पाहण्यास सुरवात केली. यातूनच त्यांने आपल्या एक एकर जागेत चाफ्याची झाडे लावण्याचा निर्णय घेतला. त्यानंतर कृषी अधिकाऱ्यांचं मार्गदर्शन घेऊन शासकीय अनुदान मिळवलं आणि वांगणी जवळच्या डोणे गावात एक एकरात सौंदर्य जातीच्या चाफ्याची ३०० झाड लावली.

३ बाय ३ मीटर अंतरावर या झाडांची लागवड केली. आता चार वर्षांच्या या बागेतून दररोज १५०० ते १८०० फुलांचे उत्पन्न मिळत आहे. कल्याण तसेच दादरच्या फुल मार्केटमध्ये चाफ्याच्या फुलाला सरासरी एक ते दोन रुपयांचा भाव मिळतो. गणेशोत्सव काळात हाच भाव जवळपास पाच ते दहापट अधिक झालेला असतो. या बागेतून सर्व खर्च वगळता संदेश सारंगा याला महिन्याकाठी सरासरी ३० ते ३५ हजारांचं उत्पन्न मिळत आहे. 

कोरोना काळात आयुष्याला कलाटणी

कोरोना काळात अनेकांच्या नोकऱ्या, रोजगार गेले. यामुळे आर्थिक नुकसान देखील सहन करावे लागले. यातून सावरत असताना आर्थिक गणित देखील कोलमडले होते. लोकडाऊन असल्याने सर्वजण घरीच होते. यामुळे घरी बसून राहण्यापेक्षा शेती करण्याचे संदेश याने ठरविले. या काळात युट्युबवर माहिती घेऊन चाफ्याची शेती करण्याचा निर्माण घेतला. आता हा निर्णय योग्य ठरत असून तेव्हापासूनच संदेशच्या आयुष्याला कलाटणी मिळाली आहे.