रामू ढाकणे 

छत्रपती संभाजीनगर : खरीप हंगामासाठी शेतकऱ्यांसाठी जाहीर करण्यात आलेल्या एक रुपयात पीक विमा योजनेत अनेक शेतकऱ्यांनी लाभ घेतला आहे. पीक विमा काढण्याची मुदत संपली असून संभाजीनगर जिल्ह्यातील ९ लाखांवर शेतकऱ्यांनी आपली पिके संरक्षित केली आहेत. खरीप हंगामासाठी ९ लाख १० हजार ८३८ रुपयांचा भरणा कंपनीकडे केला आहे.

अतिवृष्टी रोगराईसह इतर नैसर्गिक आपत्ती मधून पिकांचे नुकसान झाले; तर शेतकऱ्यांना नुकसान भरपाई मिळावी. यासाठी प्रधानमंत्री (Crop Insurance) पिक विमा योजना सुरु करण्यात आली आहे. यापूर्वी शेतकऱ्यांना पिकांचा विमा काढण्यासाठी ७००, १ हजार आणि २ हजार रुपयांचा खर्च हा प्रती हेक्टरसाठी येत होता. मात्र या योजनेत नव्याने बदल करण्यात आला असून आता केवळ १ रुपयात पिक विमा काढता येत आहे. यामुळे (Farmer) शेतकऱ्यांसाठी १ रुपयात आपले शेतातील पिके संरक्षित करता येणार आहेत. 

संभाजीनगर (Sambhajinagar) जिल्ह्यातील नऊ लाखांपेक्षा अधिक शेतकऱ्यांनी पीक विमा उतरविला असून यात ९ लाख १० हजार ८३८ रुपयांचा विमा भरणा करून यंदाच्या खरीप हंगामातील आपली पिके संरक्षित केली आहे. सद्यस्थितीला जिल्ह्यात ५ लाख ४४ हजार ७४९ हेक्टर क्षेत्रावर सोयाबीन, मका, कापूस, तूर, उडीद यासारख्या खरीप पिकांची नोंद करण्यात आली आहे.