परभणी : परभणीच्या पूर्णा शहरात कृषी उत्पन्न बाजार समिती यार्डमध्ये मागील काही महिन्यांपासून शेतकऱ्यांच्या मालाला भाव नसल्यामुळे मार्केट यार्डमध्ये शुकशुकाट पहावयास मिळत आहे. प्रामुख्याने भाव वाढीच्या अपेक्षेने घरात ठेवलेल्या सोयाबीनला चार हजार इतकाच भाव मिळत असल्याने विक्री थांबली आहे. यामुळे शेतकऱ्यांकडे सोयाबीन अजूनही पडून आहे. 

मागील वर्षी सोयाबीनला ५ हजार २०० रुपये इतका भाव शेतकऱ्यांना मिळाला होता. परंतु सध्या (Soyabean Price) सोयाबीनला चार हजार रुपये भाव मिळत असल्याने शेतकऱ्यांसह व्यापारी मोठ्या आर्थिक अडचणीत सापडला आहे. शेतकऱ्यांकडील माल कसा खरेदी करावा; असा प्रश्न व्यापारांना पडला आहे. तसेच पूर्णा तालुक्यासह जिल्ह्यात सध्या २५ ते ३० टक्के शेतकऱ्याकडे (Farmer) हजारो क्विंटल सोयाबीन पडून आहे. यामुळे शेतकऱ्यांना मोठा आर्थिक फटका बसत आहे. 

दरम्यान केंद्र सरकार व राज्य सरकारने व्यापाऱ्यांना सी. सी. अकाउंट व्याज दरात तसेच विविध आकारण्यात येणाऱ्या कर मध्ये सवलत द्यावी; अशी मागणी व्यापाऱ्यांनी केली आहे. तसेच राज्य शासनाने ठरवून दिलेला हमीभाव तरी शेतकऱ्यांना देण्यात यावा; अशी मागणी शेतकरी वर्गातून होत असून या भावात शेतकऱ्याचा कुठला खर्च निघत नाही. हीच परिस्थिती परभणी जिल्ह्यातील बाजार समिती व मोढ्यात आहे.