सागर निकवाडे 

नंदुरबार : शेतकऱ्याने शेतात पपईची लागवड केली होती. भर उन्हाळ्यात आणि पाणी टंचाईचे सावट असताना देखील पपईला जगविले. परंतु एका माथेफिरूने शेतात जाऊन पाचशेहून अधिक पपईची रोपे कापून टाकली आहेत. हा प्रकार नंदुरबार जिल्ह्यातील शहादा तालुक्यातील ईस्लामपुर येथे घडला आहे. 

नंदुरबार (Nandurbar) जिल्ह्यातील शहादा तालुक्यातील इस्लामपूर गावातील पियुष बेदमुथा या शेतकऱ्याचे नुकसान झाले आहे. पियुष बेदमुथा हे आपल्या शेतात गेल्यानंतर त्यांना हा प्रकार आढळून आला आहे. अज्ञात इसमांनी धारदार शस्त्राच्या सहाय्याने त्याच्या शेतातील पपईची झाडे तोडून फेकली आहेत. तसेच शेतातील मजुरांसाठी असलेल्या पिण्याच्या पाण्याच्या टाकीचे देखील नुकसान करून पाण्याचे नऊ नळ देखील तोडले आहेत. या प्रकारामुळे परिसरातील शेतकऱ्यांमध्ये (farmer) नाराजीचा सुर असून घटने प्रकरणी म्हसावद पोलीस ठाण्यात तक्रारी अर्ज देण्यात आला आहे. 

लाखो रुपयांचे नुकसान 

पियुष बेदमुथा हा शेतकऱ्याने शेतात पपईची (Papaya Crop) लागवड केली असताना आता त्याला फळ धारणा होण्यास सुरवात झाली होती. मात्र एकाने झाडे कापून टाकली आहेत. शेतातील ५५० पपईची झाडे तोडून लाखोचे नुकसान करण्यात आल्याचा प्रकार समोर आला आहे. याआधी देखील शहादा तालुक्यात अशाच पद्धतीने शेतीच्या नासधुसीचे प्रकार समोर आले आहेत.