संदीप भोसले 
लातूर : काही दिवसांपासून प[पावसाने विश्रांती घेतली होती. यानंतर लातूर जिल्ह्यातल्या जळकोट तालुक्यात रात्रीच्या सुमारास ढगफुटी सदृश्य पाऊस झाला. या पावसामुळे शेती पिकांचे मोठे नुकसान झाले असून प्रामुख्याने काढणीला आलेला मूग, उडीद हे पिक भुईसपाट झाले आहे. हातातोंडाशी आलेला घास हिरावून गेल्याने शेतकऱ्याचे डोळे पाणावले आहेत. 

मागील आठवडाभरापूर्वी लातूर (Latur) जिल्ह्यात पाऊस सुसु होता. मात्र मध्यंतरी पावसाने विश्रांती दिली होती. या विश्रांतीनंतर लातूर जिल्ह्यात गेल्या तीन दिवसापासून सर्वत्र पावसाने हजेरी लावली आहे. दरम्यान जिल्ह्यातील ग्रामीण भागात वादळी वाऱ्यासह जोरदार पावसाने हजेरी लावल्याने शेती (Heavy Rain) पिकांचे प्रचंड मोठं नुकसान झालं आहे. यात जळकोट तालुक्यातील होकर्ना, वांजरवाडा, उमरदरा, शिवारात ढगफुटी सदृश्य पाऊस झाल्याने काढणीला आलेल्या मूग, उडीद या शेती पिकाचं मोठं नुकसान झाले आहे. 

ढगफुटी सदृश्य पावसामुळे अक्षरशः शेती पिकं वाहून गेल्याचे चित्र आहे. ऊस, सोयाबीन, कापूस, मूग ही पिके पावसाने जमीनदोस्त झाली आहेत. त्यामुळं शेतकऱ्यांच्या हातातोंडाशी आलेला घास निसर्गाने हिरावून घेतला आहे. दरम्यान आता तात्काळ नुकसानीची भरपाई मिळावी; अशी मागणी शेतकऱ्यांकडून केली जात आहे.