भुसावळ (जळगाव) : कापूस दरवाढीची प्रतीक्षा अजूनही कायम आहे. शेतकऱ्यांनी भाववाढीच्या अपेक्षेने कापूस घरात भरून ठेवला आहे. मात्र भाव वाढीबाबत सरकारकडून कोणत्याही प्रकारच्या हालचाली दिसत नाहीत. यामुळे शेतकरी अडचणीत सापडला असून किती दिवस कापूस घरात भरून ठेवायचा या विचारातून काही शेतकरी नाईलाजाने व्यापाऱ्याला कमी दरात कापूस विक्री करत आहे.  

जळगाव जिल्ह्यातील भुसावल तालुक्यात झालेल्या बे मोसमी पावसामुळे शेतकरी चांगलाच अडचणीत आला आहे. अवकाळी पावसाचा फटका कापूस, सोयाबीन, मका या पिकांना बसला आहे. यामुळे उत्पादनात घट झाली असून चांगला भाव देखील शेतकऱ्याला मिळत नसल्याचे पाहण्यास मिळत आहे. आज ना उद्या कापसाला चांगला भाव मिळेल; या अपेक्षेने शेतकऱ्यांनी घरात कापूस साठवून ठेवला होता. 

साडेसहा ते सात हजार दरम्यान भाव 

कापूस दरवाढीबाबत सरकारतर्फे अजूनही निर्णय होत नसल्याने पाहिजे तसे भाव मिळत नसल्याची खंत शेतकऱ्यांनी बोलून दाखवली आहे. बाजारपेठेतील कापसाच्या दरातील घट व भाववाढीच्या अपेक्षेने साठवून ठेवलेला कापसाला भाव मिळत नसल्याने शेतकऱ्याचे गणित बिघडले आहे. दिवाळीपासून शेतकऱ्याने घरात कापूस साठवून ठेवला आहे. कापसाचे दर सुरुवातीपासून ६५०० ते ७ हजार दरम्यानच राहिल्याने शेतकऱ्यांनी कापूस घरात साठवून ठेवला आहे.  

नाईलाजास्तव करावी लागतेय विक्री 

आजही शेतकऱ्यांना भाव वाढीची अपेक्षा आहे. शासनाने सीसीआय मार्फत कापूस खरेदी केंद्र सुरू केले. पण तिथे शेतकऱ्यांना सात हजार ५०० पर्यंत भाव मिळत आहे. परंतु आठ ते दहा दिवस नंबर लागत नसल्यामुळे गाडी भाडे देणे परवडत नसल्याचे शेतकऱ्याचे म्हणणे आहे. तसेच त्या ठिकाणी मोठ्या अटी व शर्ती असल्याने नाईलाजाने व्यापाऱ्यांना कमी दरात कापूस विकावा लागत असल्याचे शेतकऱ्यांनी म्हटले आहे.