Parbhani News : परभणीच्या मानवत तालुक्यातील मानोली गावात गेल्या आठ दिवसात चार शेतकऱ्यांनी आपली जीवनयात्रा संपवली आहे. सततची नापिकी, दुष्काळ, कर्जबाजारीपणा तर आता अतिवृष्टीने शेतकऱ्यांच्या (Farmer) स्वप्नांची राखरांगोळी होत आहे. त्यामुळं शेतकरी आत्महत्येकडे पाऊल उचलत आहे.

मानवत तालुक्यातील मानोली (Parbhani News) हे एक छोटसं गाव. शेती प्रमुख व्यवसाय असणारे व शेतकरी संघटनेचे गाव अशी मानोलीची ओळख आहे. केवळ दोन ते तीन हजार लोकसंख्या असलेल्या गावात एकाच आठवड्यात तब्बल चार जणांनी आत्महत्या केल्याचा प्रकार समोर आला आहे. 14 डिसेंबर रोजी रवी काकडे याने गरिबीला कंटाळून गळफास घेतला. घटनेच्या दुसऱ्याच दिवशी 15 डिसेंबर रोजी ज्ञानोबा भांड या शेतकऱ्याने देखील गळफास घेऊन आत्महत्या केली. तर 19 डिसेंबर रोजी हनुमान तळेकर यांनी रेल्वेखाली येऊन तर आत्महत्या केली. तसेच 20 डिसेंबर रोजी हरिभाऊ शिंदे यांनी झाडाला गळफास घेतला. (Maharashtra Latest News)

या एका पाठोपाठ अप्रिय घटनेमुळे मानोलीत चिंतेचे वातावरण निर्माण झाले आहे. दरम्यान, उपजिल्हाधिकारी शैलेश लाहोटी, मानवत तहसीलदार,तसेच मनोविकारतज्ज्ञ डॉ. पानझडे, डॉ. अमरदीप, ग्रामसेवक भेट देऊन गावामध्ये होणाऱ्या आत्महत्या रोखण्यासाठी गावकऱ्यांशी चर्चा केली. एकीकडे आत्महत्या रोखण्यासाठी शासकीय योजना राबविण्यात येत असल्याचे ढोल वाजवले जात असले तरी या योजना केवळ कागदोपत्रीच राबविण्यात येत आहेत असा प्रश्न उपस्थित होत आह़े.