बालाजी सुरवसे 

धाराशिव : धाराशिव जिल्ह्यात एकीकडे तीव्र दुष्काळी परिस्थितीमुळे शेतकरी त्रस्त आहेत. त्यांना खरीपाची पेरणी करण्यासाठी पैसा नाही, तर दुसरीकडे दुष्काळ असलेल्या धाराशिव, लोहारा व वाशी तालुक्यातील ४१ हजार ६९८ शेतकऱ्यांना दुष्काळी अनुदान मिळण्याची प्रतीक्षा आहे. विशेष म्हणजे या शेतकऱ्यांनी केवायसी केलेली आहे. 

धाराशिव जिल्ह्यात दुष्काळी परिस्थिती आहे. यासाठी शासनाने दुष्काळी अनुदान देण्याचे जाहीर केले होते. याकरिता केवायसी करणे अनिवार्य होते. दरम्यान केवायसी केलेली असतानाही त्यांना दुष्काळी अनुदान मिळालेले नाही. त्यामुळे शेतकऱ्यांमध्ये नाराजी निर्माण झाली आहे. ३१ ऑक्टोबरला शासनाने ४० तालुक्यांमध्ये गंभीर, मध्यम स्वरूपाचा (Drought) दुष्काळ जाहीर करून विविध प्रकारच्या सवलती जाहीर केल्या होत्या. 

धाराशिव जिल्ह्यातील लोहारा, वाशी व धाराशिव या तीन तालुक्याचा समावेश आहे. यामध्ये १ लाख ५४ हजार २५९ शेतकऱ्यांना (Farmer) २०८ कोटी ५० लाख अनुदान मंजुर झाले होते. यातील ४१ हजार शेतकरी निधी नसल्याने केवायसी करुन ही दुष्काळी अनुदानापासुन वंचित आहेत. त्यामुळे हे अनुदान तातडीने द्यावे; अशी मागणी शेतकऱ्यांमधून केली जात आहे.