अक्षय गवळी 

अकोला : पीक नुकसान झालेल्या शेतकऱ्यांची दावा यादी, सर्वेक्षण झालेली यादी तसेच पात्र आणि अपात्र याची कारणासह यादी, खरीप आणि रब्बी हंगामातील नुकसानीचे पंचनामे प्रती इतर दस्ताऐवज सादर केले नाहीत. यामूळे बाळापूर तालुक्यातील ७ हजार ५५६ शेतकऱ्यांना नुकसान भरपाईचा योग्य परतावा मिळाला नसल्याने नुकसान झाले आहे. जिल्हा कृषी अधिक्षक शंकर किरवे यांच्या तक्रारीवरून बाळापूर पोलिसांत फसवणुकीचा गुन्हा दाखल करण्यात आला आहे.

पीक विम्याचा परतावा (Farmer) शेतकऱ्यांना मिळाला नसल्याच्या शेतकऱ्यांच्या तक्रारी होत्या. यावर आक्रमक भूमिका घेत बाळापूरचे शिवसेना ठाकरे गटाचे आमदार नितीन देशमुख यांनी बाळापूरचे तहसीलदार आणि तालूका कृषी अधिकाऱ्यांना बाळापूर नगरपालिकेच्या मुख्य सभागृहात तब्बल दहा तास कोंडून ठेवले होते. विमा कंपन्यांच्या (Crop Insurance company) तक्रारीविरोधात नगरपालिकेत आमदार देशमुखांनी बैठक देखील बोलावली होती. मात्र सदर बैठकीला विमा कंपन्यांचे अधिकारी गैरहजर असल्याने आमदार देशमुख संतप्त झाले होते. तर विमा कंपन्यांनी परतावा न देतांना राज्यात हजारो कोटी रूपयांचा भ्रष्टाचार केल्याचा आमदार नितीन देशमुखांची शंका आहे. 

वर्ष २०२३-२४ मधील खरीप आणि रब्बी हंगामासाठी प्रधानमंत्री पीक विमा (Crop Insurance) योजनेसाठी कागदपत्रे कृषी विभागाला अनेकदा मागणी करूनही सादर केली नाही. यामुळे विमा कंपनी 'एचडीएफसी अर्गो'च्या दोन वरिष्ठ अधिकाऱ्यांवर गुन्हे दाखल करण्यात आले आहेत. राज्य प्रतिनिधी प्रकाश श्रीवास्तव आणि विभागीय प्रतिनिधी सुनिल भालेराव यांच्यावर गुन्हे दाखल केले.