Bogus Seeds : सव्वा लाखाचे प्रतिबंधित बोगस बियाणे जप्त; विक्रेत्यास घेतले ताब्यात

संजय राठोड

यवतमाळ : खरीप हंगामासाठी शेतकऱ्यांची तयारी सुरु झाली. बागायतदार शेतकरी मे महिन्याच्या शेवटच्या (Yavatmal) आठवड्यात कापसाची लागवड करत असतात. त्या अनुषंगाने बाजारात बियाणे दाखल होण्यास सुरवात झाली आहे. दरम्यान राज्यात प्रतिबंधित असलेले बियाणे येत असून यवतमाळमध्ये असे सव्वा लाखाचे बियाणे जप्त करण्यात आले आहे. 

खरीप हंगाम तोंडावर आला असून (Farmer) शेतकरी वर्ग खरीप पूर्व मशागतीच्या कामांत व्यस्त आहे. तर दुसरीकडे बाजारात वेगवेगळ्या कंपनीचे कापसासह इतर बियाणे विक्रीसाठी दाखल झाले आहेत. दरम्यान कृषी विभागाकडून कापसाचे काही बियाणे विक्रीस प्रतिबंधित केले आहेत. तरी देखील यवतमाळच्या मारेगाव तालुक्यातील चिंचाळा येथे कापसाचे बोगस बियाणे (Bogus Seeds) विक्री केली जात होती. हे बियाणे विक्री करणाऱ्यावर कृषी विभागाच्या पथकाने कारवाई केली. 

विक्रेत्यास घेतले ताब्यात 

कृषी विभागाच्या (Agriculture Department) कारवाईत ७८ बोगस बियाण्यांचे पाकिट ताब्यात घेण्यात आले असून, पोलिस ठाण्यात या संदर्भात तक्रार दाखल करण्यात आली आहे. विलास चिकटे (रा. चिंचाळा) याला ताब्यात घेण्यात आले असून त्यांच्याकडून ७८ कापूस बियाण्यांचे पाकिट जप्त करण्यात आले आहेत. त्या पाकिटावर ८६३ रूपये किंमत असून एकूण १ लाख १ हजार रूपयांचा मुद्देमालासह विकास चिकटे यास ताब्यात घेण्यात आले आहे.