Soyabean Price : लातूर बाजारपेठेत सोयाबीनला हमीभावापेक्षा कमी दर; शेतकऱ्यांमध्ये नाराजी

संदीप भोसले 

लातूर : भाववाढीच्या अपेक्षेने शेतकऱ्यांनी सोयाबीनची घरात साठवणूक करून ठेवली होती. मात्र सोयाबीनच्या भावात वाढ तर झाली नाही, परंतु सरकारने ठरवून दिलेल्या हमीभावापेक्षा कमी दराने सोयाबीनची विक्री करावी लागत आहे. लातूरच्या बाजार समितीमध्ये कमी भाव मिळत असल्याने शेतकऱ्यांमध्ये नाराजीचा सूर आहे. 

सोयाबीनचे उतपादन घेतल्यानंतर भविष्यात सोयाबीनचे दर वाढतील; या आशेवर शेतकऱ्यांनी मोठ्या प्रमाणात सोयाबीन घरातच साठवून ठेवले आहे. मात्र वर्ष संपत आले तरी सोयाबीनला चांगला दर (Soyabean Price) मिळत नाही. मात्र चक्क आता सोयाबीन हमीभावापेक्षा कमी ने विक्री होत आहे. तर याकडे बाजार समिती प्रशासनाचे देखील लक्ष नसल्याने शेतकऱ्याच्या अर्थकारणाला मोठा धोका असल्याची चर्चा जिल्हाभरात आहे.

सोयाबीनला प्रति क्विंटल ४ हजार ६०० रुपये इतका हमीभाव असताना लातूरच्या कृषी उत्पन्न बाजार समितीत (Bajar Samiti) मात्र हमीभावापेक्षा कमी दराने सोयाबीनची विक्री होत आहे. दरम्यान शासनाने ठरवून दिलेला हमीभाव लागू तरी कधी होणार? असा  प्रश्न शेतकऱ्यांसमोर निर्माण झाला आहे. यामुळे शेतकरी वर्गात प्रचंड नाराजी निर्माण झाल्याचं चित्र आहे.