Cotton Price: जिनिंग उद्योग संकटात; कापसाची आवक नसल्याचा परिणाम

जळगाव : गतवर्षीप्रमाणे यंदा देखील जानेवारी– फेब्रुवारीमध्‍ये कापसाचे दर वाढतील अशी आशा (Farmer) शेतकरींमध्‍ये अजूनही आहे. यामुळे कापूस विक्रीसाठी आणत नसल्याचे चित्र सध्‍या सर्वत्र पहावयास मिळत आहे. यामुळे कापसाची आवक कमी झाल्‍याचा फटका जिनिंग उद्योगाला बसत आहे. यामुळे आता कापसाचे दर (Cotton Price) कधी वाढतील व जिनिंग सुरू होतील; याची प्रतिक्षा सर्वत्र आहे. (Tajya Batmya)

गेल्यावर्षी कापसाला चांगला भाव भेटल्याने जानेवारी अखेरपर्यंत जळगाव जिल्ह्यातील ९० टक्के शेतकऱ्यांनी आपला माल विक्री केला होता. यंदा देखील कापसाला चांगला दर मिळेल; अशी अपेक्षा बळीराजाला होती. परंतु, अद्यापपर्यंत चांगला दर मिळालेला नाही. यामुळे शेतकरी देखील विवंचनेत अडकला आहे.

शंभर जिनिंगमध्‍ये आवकच नाही

यंदा हंगाम सुरु झाल्यापासूनच कापसाचे दर गेल्यावर्षाच्या तुलनेने कमी आहेत. त्यामुळे शेतकऱ्यांनी अद्याप माल बाजारात आणला नाही. खान्देशात आतापर्यंत केवळ ४ लाख गाठींची खरेदी झाली आहे. खानदेशातील १५० पैकी केवळ ५० जिनिंग सध्या सुरू आहेत. तर १०० जिनिंगमध्ये कापसाची आवकच नाही. यामुळे या जिनिंगमध्ये काम करणाऱ्या १० हजार मजुरांचा रोजगार गेला आहे.