Dhule News: कर्जबाजारी शेतकऱ्याने विहिरीत उडी मारून संपविले जीवन

चिमठाणे (धुळे) : वाडी (ता. शिंदखेडा) येथील ४५ वर्षीय तरुण शेतकऱ्याने (Farmer) बुधवारी (११ जानेवारी) दुपारी गावशिवरातील विहिरीत उडी घेत जीवनयात्रा संपविली. याबाबत शिंदखेडा पोलिस ठाण्यात आकस्मिक मृत्यू्ची नोंद करण्यात आली. (Letest Marathi News)

वाडी येथील शेतकरी लोटनसिंह इंद्रसिंह गिरासे यांची गावशिवरात तीन एकर शेतजमीन असून, त्यांनी मालपूर (ता. शिंदखेडा) येथील सेंट्रल बँक ऑफ इंडिया शाखेतून पीककर्ज व शेतीपयोगी कर्ज घेतले होते. नैसर्गिक संकटामुळे कर्ज फेडता येत नसल्याच्या विवंचनेतून बुधवारी दुपारी तीनच्या सुमारास गावशिवरातील मोहनसिंह निंबा गिरासे यांच्या विहिरीत उडी मारत आत्‍महत्‍या केली. त्यांच्‍या पश्‍चात पत्नी व दोन मुले आहेत.

गिरासे यांनी विहिरीत उडी मारल्याचा फोन आल्याने गावातील ललित गिरासे, रवींद्र गिरासे, मानसिंह गिरासे आदींनी त्यांना विहिरीतून बाहेर काढले. खासगी वाहनाने शिंदखेडा (Shindkheda) येथील ग्रामीण रुग्णालयात नेले असता वैद्यकीय अधिकारी डॉ. सुशांत गवांदे यांनी सायंकाळी साडेसहाला मृत घोषित केले. याबाबत चुलत पुतणे मोहनसिंह प्रतापसिंह गिरासे यांनी शिंदखेडा पोलिस ठाण्यात खबर दिल्यावरून आकस्मिक मृत्यू्ची नोंद करण्यात आली.