मोरिंगा म्हणजेच शेवग्याच्या पानांची चटणी ही चवदार आणि पौष्टिक सुपरफूड म्हणून ओळखली जाते. या चटणीत अनेक महत्त्वाचे जीवनसत्त्वे, खनिजे आणि अँटीऑक्सिडंट्स असतात, जे शरीरासाठी फायदेशीर ठरतात. वजन कमी करण्यासाठी ही खूप उपयुक्त असते.
चटणी बनवण्यासाठी ताजी मोरिंगा पानं देठांपासून वेगळी करून स्वच्छ पाण्याने नीट धुवून घ्यावीत.
ताजी पानं वापरल्यास चटणीची चव आणि पौष्टिकता दोन्ही वाढतात.
यानंतर चणा डाळ आणि उडीद डाळ मंद आचेवर हलक्या सोनेरी रंगाची होईपर्यंत भाजून घ्या. त्यात जिरे, हिंग, लसूण आणि हिरव्या किंवा सुक्या मिरच्या घालून पुन्हा काही मिनिटं परता. मसाल्यांचा छान सुगंध येऊ लागला की पुढील प्रक्रिया सुरू करा.
भाजलेल्या मसाल्यांच्या मिश्रणात मोरिंगाची पानं घालून सर्व साहित्य व्यवस्थित एकत्र मिसळा. मंद आचेवर पानं थोडी मऊ आणि शिजेपर्यंत परतत राहा. यामुळे पानांमधील नैसर्गिक कडूपणा कमी होऊन चटणी अधिक स्वादिष्ट बनते.
जर तुम्हाला चटणीत थोडी आंबट आणि वेगळी चव हवी असेल तर त्यात चिंच, मीठ आणि किसलेलं ताजं खोबरं घालू शकता. हे साहित्य चटणीची चव अधिक समृद्ध आणि संतुलित बनवते. सर्व घटक एकजीव होईपर्यंत काही वेळ परतून घ्या.
तयार झालेले मिश्रण एका ताटात किंवा भांड्यात काढून पूर्णपणे थंड होण्यासाठी ठेवा. मिश्रण थंड झाल्यानंतर ते मिक्सरच्या भांड्यात घालून वाटण्यासाठी तयार करा. गरजेनुसार थोडं पाणी घालून त्याला योग्य पोत द्या.
मिक्सरमध्ये मिश्रण बारीक किंवा जाडसर तुमच्या आवडीनुसार वाटून चटणी तयार करा. शेवटी कढीपत्ता आणि सुक्या लाल मिरचीची फोडणी दिल्यास तिची चव आणखी छान लागते. ही पौष्टिक मोरिंगाची चटणी डोसा, इडली, पोळी किंवा भाकरीसोबत अतिशय स्वादिष्ट लागते.