Viral Video : धावत्या स्कुटीवर विजेचा खांब पडता पडता राहिला, महिला थोडक्यात बचावली, घटना CCTV मध्ये कैद

पश्चिम दिल्लीतील टागोर गार्डन परिसरात सोमवारी सायंकाळी एक मोठी दुर्घटना अवघ्या काही सेंकदांच्या फरकाने टळली. पावसामुळे आधीच ओलसर व घसरत्या झालेल्या रस्त्यावरून एक महिला स्कूटरने जात असताना अचानक तिच्या मागून एक जुना विजेचा खांब कोसळला. खांब थेट स्कूटरवर पडला, पण सुदैवाने महिलेचा जीव वाचला असून तिला किरकोळ दुखापत झाली आहे.

ही घटना सायंकाळी ५:३० च्या सुमारास टागोर गार्डनच्या एडी ब्लॉक परिसरात घडली. ही महिला एक फिजिओथेरपिस्ट असल्याचं समोर आलं आहे. रस्त्याच्या कडेला लावलेले दोन जुने विजेचे खांब अचानक तुटून खाली पडले. त्याच क्षणी स्कूटरवरून जात असलेल्या महिलेच्या वाहनावर मागच्या बाजूला एक खांब आदळला. या घटनेदरम्यान प्रसंगावधान राखून आजूबाजूच्या लोकांनी धाव घेत महिलेची सुटका केली. ही सर्व घटना सीसीटीव्ही कॅमेऱ्यात कैद झाली आहे.

स्थानिकांनी सांगितले की, या परिसरातील अनेक विजेचे खांब वर्षानुवर्षे झुकलेले किंवा कमकुवत अवस्थेत आहेत. प्रशासनाकडे अनेक वेळा तक्रारी करूनही दखल घेतली जात नसल्याचा आरोप नागरिकांनी केला आहे. पावसाळ्याच्या काळात असे खांब कोणत्याही क्षणी कोसळून गंभीर दुर्घटना घडवू शकतात, असेही त्यांनी सांगितले.

या घटनेने पुन्हा एकदा दिल्लीतील सार्वजनिक सुरक्षा व्यवस्थेवर प्रश्नचिन्ह उपस्थित केले आहे. ज्या प्रकारे महिलेच्या केवळ थोडक्यात जीव वाचला, ते पाहता संबंधित विभागांनी तत्काळ कारवाई करून अशा धोकादायक विजेच्या खांबांची तपासणी व दुरुस्ती करावी, अशी मागणी जोर धरत आहे. हा अपघात टळला असला, तरी भविष्यात अशा निष्काळजीपणाचा मोठा फटका बसू शकतो, याची जाणीव प्रशासनाने घेतली पाहिजे.