मुंबईच्या लोकलची गर्दी म्हटली की काळजात धडकी भरते. यामुळं चीडचीड, राग, संतापानं प्रवाशाचा चेहरा आधीच लालबूंद असतो. त्यात संयम, सहनशक्तीही कमी झालेली आहे. मग थोडा जरी कुणाचा धक्का लागला की लालबूंद रागाने भरलेल्या चेहऱ्यामागे दडलेला रागीट, तापट माणूस जागा होता आणि मग ट्रेनच्या डब्याचा थेट WWE चा आखाडा होतो. प्रवाशांमध्ये शिवीगाळ होते, मग थेट हाणामारीपर्यंत प्रकरण पोहोचतं. असाच एक मुंबईच्या लोकलमधील फ्री स्टाइल हाणामारीचा व्हिडिओ सोशल मीडियावर व्हायरल होत आहे.
लोकलमधून प्रवास करताना ज्याने त्याने शिंगावर माती घेतलेली असते. असाच काहीसा प्रकार या व्हिडिओमध्ये दिसतोय. ट्रेनमध्ये गर्दी दिसतेय. दोघे जण एकमेकांना धक्काबुक्की करत आहेत. एक तर थेट WWE च्या रिंगमधला रेसलरच दिसतोय. तो दुसऱ्या प्रवाशाला एखाद्या गुंड प्रवृत्तीच्या माणसासारखा बुक्क्या मारताना दिसतोय. काही प्रवाशांनी बघ्याची भूमिका घेतली. तर त्यांच्या बाजूलाच असलेल्या प्रवाशांनी मध्यस्थी करून भांडण मिटवण्याचा प्रयत्न केला.
मुंबईच्या लोकलची खासियत म्हणजे तिला जीवनवाहिनी म्हटलं जातं. पण भरमसाठ वाढलेली लोकसंख्या, ट्रेनची संख्या कमी यामुळं गर्दीची लोकल अशी तिची हळूहळू ओळख झाली आहे. पहाट असो की सकाळ, दुपार असो की रात्र...गर्दी हमखास ठरलेली. मग यामुळं गर्दी आणि चीडचीड. बसायला जाऊ द्या हो, पण उभं राहणंही कठीण झालेलं आहे. उभं तरी कशाला, पाय ठेवायलाही जागा नसते. मग कधी सीटवरून, कधी धक्का लागला तरी एखाद्याचा पारा लगेच चढतो आणि तो तर भांडणावरच येतो. बाचाबाची झाली अन् चूक कोणाची तुझी की माझी, यावरच हा वाद थांबत नाही. कधी-कधी तर भांडखोर लोक थेट हाणामारीवरच येतात. काही काही तर इतके विक्षिप्त असतात की लोकलमध्ये चढतानाच हाताचे दोन्ही कोपरे दणादण मारत सुटतात. कोण कोणाची कॉलर धरतो, कोण शिवीगाळ करतो तर कोण माजुरडेपणा दाखवतो. आता ही जीवनवाहिनी जीवघेणी झाली आहे, अशा शब्दांत काही प्रवासी प्रतिक्रिया देतात. तर ट्रेनमधल्या या गर्दीत आता जीव घुसमटतोय, असंही काही प्रवासी बोलू लागले आहेत. या गर्दीतून सुटका कधी होणार, असाच प्रश्न आहे.
दरम्यान, या दोन प्रवाशांमध्ये नेमका वाद कशावरून झाला, ही घटना नेमकी कधी आणि कोणत्या लोकलमध्ये घडली, कुठे घडली याबाबतचा तपशील कळू शकलेला नाही. हा व्हिडिओ सोशल मीडियावर व्हायरल होत असून, याची पडताळणीही झालेली नाही.