मुंबईत सकाळ समूहाच्या माध्यमातून यिन मिनिस्ट्री 2026 अधिवेशन उत्साहात|VIDEO

सकाळ समूहाच्या माध्यमातून आयोजित ‘यिन मिनिस्ट्री 2026’ अधिवेशन आज मुंबईतील यशवंतराव चव्हाण सभागृहात उत्साहात पार पडले. या कार्यक्रमाला विधानपरिषदेचे सभापती आमदार प्रा. राम शिंदे उपस्थित होते. त्यांनी युवा प्रतिनिधींशी संवाद साधत युवकांच्या प्रश्नांवर चर्चा केली तसेच नेतृत्व आणि शासन व्यवस्थेबाबत मार्गदर्शन केले.

राज्यभरातील युवा प्रतिनिधी या अधिवेशनात सहभागी झाले होते. यिन मिनिस्ट्री 2026 च्या नवव्या सत्रात निवडून आलेल्या प्रतिनिधींना आमदार प्रा. राम शिंदे यांच्या हस्ते शपथ देण्यात आली. यावेळी, ‘यिन’च्या माध्यमातून भविष्यात राबवण्यात येणाऱ्या सामाजिक उपक्रमांमध्ये सक्रिय सहभाग घेण्याची आणि समाजातील प्रत्येक घटकाला न्याय देण्यासाठी कार्य करण्याची शपथ त्यांनी घेतली.

महाराष्ट्र राज्याच्या ‘यिन’ मंत्रिमंडळात माझी निवड झाल्याचा मला अभिमान असून ही संधी माझ्या जडणघडणीत मोलाची ठरेल, असा विश्वास व्यक्त करत विद्यार्थ्यांनी भविष्यातील उपक्रमांमध्ये सक्रिय सहभाग नोंदवण्याचा निर्धार व्यक्त केला. तसेच ‘यिन’ने दिलेली जबाबदारी, आचारसंहिता आणि नियमांचे काटेकोर पालन करून विधायक कार्य उभे करण्याचा संकल्प त्यांनी यावेळी केला.