बॉम्ब से उडा दूंगा... संजय राऊत यांना धमकी, मुंबई पोलिसांसह बॉम्बशोधक पथक थेट घरी पोहोचले, VIDEO

मयूर राणे, मुंबई | साम टीव्ही

शिवसेना ठाकरे गटाचे खासदार संजय राऊत यांच्या घराबाहेर पार्क केलेल्या कारवर बॉम्बने उडवून देऊ असा मजकूर लिहून धमकी देण्यात आली आहे. या प्रकाराची गंभीर दखल मुंबई पोलिसांनी घेतली आहे. बॉम्बनाशक आणि शोधक पथकासह मुंबई पोलीस संजय राऊत यांच्या भांडुपच्या घरी पोहोचले. राऊत यांच्या घराबाहेरच संशयास्पद कार आढळली. त्या कारच्या काचेवर प्रचंड धूळ बसली आहे. या काचेवर 'बॉम्ब से उडा देंगे' अशा आशयाचा मजकूर लिहिण्यात आला आहे. काही महिन्यांपूर्वीच संजय राऊत यांना अशाच प्रकारची धमकी देण्यात आली होती. घराबाहेरील सीसीटीव्ही फुटेज तपासण्यात येत आहे. तसेच घराबाहेर पोलिसांचा बंदोबस्त ठेवण्यात आला आहे.

संजय राऊत यांच्या घराबाहेर उभ्या असलेल्या कारच्या काचेवर हा धमकी देणारा मजकूर होता. संजय राऊत यांच्या कुटुंबातील सदस्यांनीच हा अशा प्रकारे मजकूर लिहण्यात आल्याचे बघितले. त्यानंतर पोलिसांना माहिती देण्यात आली. पोलिसांनी तात्काळ घटनास्थळी धाव घेतली. बॉम्बशोधक आणि नाशक पथकासह मुंबई पोलीस तात्काळ राऊतांच्या घरी पोहोचले. त्यांनी या घटनेचा तपास सुरू केला आहे.