MLC Election : ठाण्यात एकनाथ शिंदेंची मोठी खेळी, विश्वासू उमेदवाराला मैदानात उतरवले

MLC Election, Ravindra Phatak : गेल्या काही दिवसांपासून राजकीय वर्तुळात उत्सुकता लागून राहिलेल्या ठाणे विधान परिषद निवडणुकीसाठी अखेर शिवसेनेने आपला उमेदवार निश्चित केला आहे. शिवसेनेचे माजी आमदार रवींद्र फाटक यांना पक्षाकडून पुन्हा एकदा निवडणूक लढवण्याची संधी देण्यात आली आहे.

ठाणे विधान परिषदेच्या जागेसाठी महायुती किंवा शिवसेनेकडून हितेंद्र ठाकूर यांच्या नावाचा विचार होणार की रवींद्र फाटक यांना संधी मिळणार, याबाबत गेल्या काही दिवसांपासून जोरदार रस्सीखेच आणि चर्चा सुरू होत्या. मात्र, आज या सर्व चर्चांना पूर्णविराम मिळाला आहे.

ठाण्यातील टेंभी नाका येथील पक्षकार्यालय असलेल्या 'आनंद आश्रम'मध्ये रवींद्र फाटक यांच्याकडे उमेदवारी अर्ज सुपूर्द करण्यात आला. पक्षाचे वरिष्ठ नेते आणि प्रमुख पदाधिकाऱ्यांच्या उपस्थितीत हा अर्ज त्यांना देण्यात आला.

मिळालेल्या माहितीनुसार, रवींद्र फाटक दुपारी १२:०० वाजता ठाणे जिल्हाधिकारी कार्यालयात जाऊन आपला उमेदवारी अर्ज अधिकृतपणे दाखल करणार आहेत. फाटक यांच्या उमेदवारीमुळे ठाण्यातील राजकीय हालचालींना आता वेग आला आहे.