Tanaji Sawant - Thackarey Group : तानाजी सावंत - ठाकरे गटाचे कार्यकर्ते आमनेसामने; जोरदार घोषणाबाजी करत शक्तीप्रदर्शन

भूम परांडा मतदारसंघात दोन्ही शिवसनेनेचे कार्यकर्ते आमनेसामने आलेले बघायला मिळाले. तानाजी सावंत आणि ठाकरे गटाचे कार्यकर्ते हे भूममध्ये रॅलीदरम्यान समोरासमोर आल्याने काही कल तणाव निर्माण झाला होता. यावेळी तानाजी सावंत यांची रॅली दिसताच ठाकरे गटाकडून जोरदार घोषणाबाजी करण्यात आली आहे. उद्धव ठाकरे आणि ज्ञानेश्वर पाटील यांचे बॅनर देखील यावेळी दाखवण्यात आले आहे.

भूम परांडा मतदारसंघात महायुतीचे उमेदवार तानाजी सावंत यांनी काल जोरदार घोषणाबाजी करत आपला उमेदवारी अर्ज दाखल केला आहे. यावेळी भूमच्या मुख्य चौकात त्यांची रॅली येताच याठिकाणी ठाकरे गटाचे उमेदवार रणजित पाटील यांची सभा नुकतीच पार पडलेली असल्याने त्यांचे कार्यकर्ते देखील या ठिकाणी उपस्थित होते. त्यामुळे तानाजी सावंत यांची रॅली दिसताच ठाकरे गटाच्या कार्यकर्त्यांनी जोरदार घोषणाबाजी सुरू केली. यावेळी तानाजी सावंत यांना माजी आमदार ज्ञानेश्वर पाटील, रणजित पाटील आणि उद्धव ठाकरे यांचे फोटो दाखवण्यात आले आहे. मात्र विशेष म्हणजे तानाजी सावंत यांनी प्रसंगावधान राखत अनर्थ टाळण्यासाठी आपली रॅली या ठिकाणी काही काळ थांबवलेली दिसली. ठाकरे गटाचे कार्यकर्ते पुढे गेल्यावर त्यांनी आपली रॅली पुढे नेलेली बघायला मिळाली.

Edited By Rakhi Rajput