Kolhapur News: पिता, दूध, डोळे मिटूनी....दारासमोरच्या पिशवीतून दूध व्हायचं गायब; CCTV कॅमेऱ्यात कैद झाला भलताच चोर|VIDEO

मांजर दूध पिते, तिला वाटतं की आपल्याला कुणी बघतच नाही. पण एक दिवस ती मांजर सापडतेच. असाच काहीसा विचित्र प्रकार कोल्हापूर नगरीत उघडकीस आला आहे. रहिवाशांच्या घराच्या दारात लावलेल्या पिशवीतील दूध चोरीला जात होतं. मांजरांची टोळी ही दूध फस्त करत असावी, असा समज सुरुवातीला झाला. पण रोज दूध गायब होतं, तेही एक-दोन दिवस नाही, तर बरेच दिवस हा प्रकार सुरू होता. रहिवाशांच्या मनात संशयाची पाल चुकचुकली आणि खरा चोर सापडला.

कोल्हापूरच्या आर. के. नगर येथील मोरेवाडीत हा सगळा प्रकार घडत होता. येथील रहिवाशांच्या दारात दूधाची पिशवी लावलेली असायची. दूधवाला रोज पहाटे या पिशव्यांमध्ये दूधाची पिशवी टाकायचा. पण सकाळी घरातील माणसं दूध घ्यायला आले की त्यातील दुधाची पिशवी गायब असायची. कदाचित मांजरांच्या टोळीला चट लागली असावी आणि ते पिशव्यांमधून दूध गायब करत असावी, असा समज रहिवाशांचा झाला. पण काहींच्या मनात शंकेची पाल चुकचुकली. संशय बळावला. रहिवाशांनी घरासमोरच सीसीटीव्ही कॅमेरे लावले. चोराला याची पुसटशी कल्पनाही नव्हती. अखेर दूध गायब करणारी खरी 'मांजर' या सीसीटीव्ही कॅमेऱ्यात कैद झाली. मॉर्निंग वॉकसाठी जाणारी महिला या पिशव्यांमधील दूध चोरायची. खरा चोर सापडल्यानंतर रहिवाशांना चारशे चाळीस व्होल्टचा झटकाच लागला.