तटकरे जन्माला आले तेव्हाच...; शिंदेसेनेच्या आमदाराची जीभ घसरली, काय म्हणाले? पाहा व्हिडिओ

सचिन कदम, साम टीव्ही

रायगड जिल्ह्यातील माणगाव येथील प्रवेश सोहळ्यात शिंदेसेनेचे आमदार महेंद्र दळवी यांची जीभ घसरल्याचा प्रकार समोर आला आहे. राष्ट्रवादी काँग्रेसचे प्रदेशाध्यक्ष आणि खासदार सुनील तटकरे यांच्याबद्दल बोलताना दळवींनी आक्षेपार्ह शब्दांचा वापर केला. त्यांच्या या वक्तव्यामुळे रायगडच्या राजकीय वर्तुळात चर्चेला उधाण आले आहे. माणगावमधील प्रवेश सोहळ्यात बोलताना महेंद्र दळवींनी सुनील तटकरे यांच्यावर जोरदार निशाणा साधला. यावेळी त्यांनी तटकरेंचा उल्लेख करताना अत्यंत आक्षेपार्ह भाषेचा वापर केला.

तटकरे असा अवलिया आहे, जन्माला आला तेव्हा गेला असता तर वारभर कपड्यात गेला असता, आता सहा मीटर कपडा लागेल, असा वादग्रस्त उल्लेख दळवींनी केला. यावेळी बोलताना दळवींनी, 'आता माझी भाषा संपली, शेवटच्या टोकाचं बोलतोय, असंही म्हटलं. तसेच शिवसेना आणि राष्ट्रवादीत दरार नाही, तर दरी पडली आहे. ही दरी कधीही मिटणार नाही, असं विधान त्यांनी केलं. महेंद्र दळवी यांच्या या वक्तव्यामुळे रायगडमधील शिवसेना आणि राष्ट्रवादी काँग्रेसमधील राजकीय संघर्ष पुन्हा एकदा चर्चेत आला आहे.