VIDEO : सरकारने राज्यातील 13 कोटी जनतेला उत्तर द्यावं; संभाजीराजे छत्रपतींना धारेवर धरल

अरबी समुद्रात आठ वर्षांपूर्वी सरकारने जलपूजन केलेल्या छत्रपती शिवाजी महाराजांच्या स्मारकाचा शोध घेण्यासाठी संभाजीराजे छत्रपती निघाले आहेत. संभाजी राजे कार्यकर्त्यांसह मुंबईतील गेट वे ऑफ इंडियाच्या परिसरात रविवारी दाखल झाले. मात्र पोलिसांनी त्यांना पुढे जाऊ दिले नाही. यावेळी पोलिसांकडून स्वराज्य पक्षाच्या कार्यकर्त्यांची धरपकड करण्यात आली. त्यानंतर संभाजी राजे यांनी पोलिसांशी चर्चा केल्यानंतर कार्यकर्त्यांना शांत राहण्याचे आवाहन केले. यावेळी शिवस्मारकाच्या मुद्द्यावरुन संभाजीराजे यांनी सरकारला धारेवर धरत केंद्रात आणि राज्यात तुमचे सरकार आहे, मग स्मारक का होत नाही? असा सवाल उपस्थित केला. त्यावेळी सर्व परवानग्या असल्याशिवाय पंतप्रधानांना जलपूजनासाठी बोलावणे चुकीचे आहे. पुढे निवडणुका होत्या म्हणून घाईघाईत जलपूजन केले का? असे संभाजीराजे म्हणाले. कोणत्याही प्रकल्पाचे पंतप्रधानांच्या हस्ते जलपूजन होते तेव्हा सर्व परवानग्या असणे गरजेचे होते. अरबी समुद्रात छत्रपती शिवाजी महाराज यांचे स्मारक उभारण्यासाठी कोट्यवधी रूपये खर्च केले गेले. मग कुठे आहे हे स्मारक? त्यामुळे आम्ही स्मारक शोधण्यासाठी मोहीम काढली आहे. सरकारने राज्यातील 13 कोटी जनतेला उत्तर द्यावे. आम्ही कायदा हातात घेणार नाही, असं देखील त्यांनी म्हंटलं आहे.