Rahul Solapurkar : राहुल सोलापूरकरांविरोधात पुण्यात आंदोलन; कारवाईची मागणी | Video

अभिनेते राहुल सोलापूरकर यांच्या विरोधात आता पुण्यात मराठा सेवकांनी आंदोलन सुरू केलं आहे. यावेळी आंदोलक जोरदार घोषणाबाजी करत आक्रमक झालेले बघायला मिळाले. राहुल सोलापूरकर यांचं भांडारकर प्राच्यविद्या संशोधन संस्थेतील सदस्यत्व रद्द करा, अशी मागणी देखील यावेळी आंदोलकांनी केली आहे.

छत्रपती शिवाजी महाराजांबाबत वादग्रस्त वक्तव्य केल्यामुळे मराठी अभिनेते राहुल सोलापूरकर यांच्यावर सर्वच स्तरातून टीका होत आहे. छत्रपती शिवाजी महाराज यांनी औरंगजेबाच्या वजीर आणि त्याच्या पत्नीला लाच देऊन आग्र्याहून सुटले. पेटारे-बिटारे काही नव्हते. चक्क लाच देऊन ते तिथून बाहेर पडले त्यासाठी किती हुंडा वटवला याचे पुरावेही आहेत, असं सांगत मराठी अभिनेते राहुल सोलापूरकर यांनी नव्या वादाला तोंड फोडलं आहे. त्यानंतर त्यांच्यावर आता टीका होत आहे. मराठी सिनेसृष्टी बरोबरच राजकीय वर्तुळातून देखील त्यांच्यावर टीका केली जात आहे. त्याच अनुषंगाने आज पुण्यात मराठा सेवकांनी भांडारकर प्राच्यविद्या संशोधन संस्थेत आंदोलन केलं आहे. यावेळी घोषणाबाजी करत राहुल सोलापूरकर यांचं भांडारकर प्राच्यविद्या संशोधन संस्थेतील सदस्यत्व रद्द करण्याची मागणी देखील करण्यात आलेली आहे. तसंच सोलापूरकर यांनी शिवाजी महाराजांच्या अपमान केला असल्याने त्यांच्यावर कारवाई करण्याचीही मागणी केली जात आहे.