पुण्यात अग्नितांडव; महापालिकेच्या अग्निशमन दलाच्या गाड्या घटनास्थळी|VIDEO

पुणे शहरातील लक्ष्मी रोड परिसरात आज दुपारी अचानक आग लागल्याची घटना घडली आहे. शिवाजीराव आढाव वाहनतळामध्ये असणाऱ्या विद्युत डीपीला आग लागल्याने परिसरात एकच खळबळ उडाली. आग लागल्याचे लक्षात येताच नागरिकांनी तत्काळ अग्निशमन दलाला माहिती दिली. महापालिकेच्या अग्निशमन दलाच्या गाड्या तातडीने घटनास्थळी दाखल झाल्या असून, आग नियंत्रणात आणण्याचे प्रयत्न सुरू आहेत.

सुदैवाने आगीमध्ये कोणतीही जीवितहानी झाल्याचे वृत्त नाही. घटनेनंतर खबरदारी म्हणून लक्ष्मी रोडवरील वाहतूक काही काळासाठी पूर्णपणे बंद करण्यात आली आहे. रविवार असल्याने आणि दिवाळीपूर्व खरेदीसाठी परिसरात मोठ्या प्रमाणात गर्दी होती, त्यामुळे वाहतूक पोलिसांना वाहनं वळवावी लागली. लक्ष्मी रोड हा पुण्यातील प्रमुख खरेदी केंद्र असल्याने या घटनेमुळे अनेक नागरिकांना अडचणींचा सामना करावा लागत आहे. अग्निशमन दल आणि पोलिसांनी नागरिकांना विनाकारण गर्दी करू नये आणि पर्यायी मार्गांचा वापर करावा, असे आवाहन केले आहे.