Pune News: माजी नगरसेवकाच्या जावयाची गुंडगिरी; वाहनांची तोडफोड, परिसरात भीतीचं वातावरण, काय घडलं? VIDEO

पुणे – कोंढवा परिसरात माजी नगरसेवक हाजी गफूर पठाण यांच्या जावई जावेद पठाण याने टोळक्यांसह रस्त्यावर हैदोस मांडल्याची घटना समोर आली आहे. किरकोळ बाचाबाचीवरून सामाजिक कार्यकर्ते इम्तियाज शेख यांच्या वाहनांची तोडफोड करण्यात आली. हातात कोयते घेऊन जावेद पठाण आणि त्याच्या साथीदारांनी रात्री साडेअकरा वाजता दहशतीचं वातावरण निर्माण केलं. संपूर्ण प्रकार सीसीटीव्ही कॅमेऱ्यात कैद झाला आहे.

या घटनेमुळे परिसरात नागरिकांमध्ये भीतीचं वातावरण निर्माण झालं आहे. आश्चर्याची बाब म्हणजे, घटनेनंतर इतका वेळ उलटून गेला तरी पोलिसांकडून अद्यापही कोणतीही अटक करण्यात आलेली नाही. मिळालेल्या माहितीनुसार, यापूर्वीही जावेद पठाण याच्यावर याचप्रकारचा गुन्हा दाखल असल्याची माहिती समोर आली आहे. तरीही त्याच्यावर कोणतीही कारवाई झाली नसल्यामुळे तो अधिकच मोकाट झाला असल्याची चर्चा आहे.