Pune Crime : ना डोकं, ना हाथ, ना पाय; पुण्याच्या मुठा नदीकाठावर वाहून आलेल्या त्या मृतदेहाचे गूढ कायम

अक्षय बडवे, साम टीव्ही, पुणे

पुण्यातील खराडी परिसरातून एका महिलेचा मृतदेह मुठा नदीच्या काठावर वाहून आला होता. सोमवारी दुपारी ही घटना समोर आली होती. धक्कादायक बाब म्हणजे शिर, हात-पाय नसलेले धड होतं. हा मृतदेह महिलेचा असल्याचं तपासात समोर आलं होतं. महिलेचा इतक्या निर्घृणपणे खून करून मृतदेह नेमका कोणी आणि कधी नदीत टाकला, हे अद्याप समोर येऊ शकलेले नाही.

पुणे पोलिसांनी युद्धपातळीवर तपास सुरू केला आहे. नदीच्या परिसरात ड्रोनच्या मदतीने तपास केला जात आहे. याशिवाय गेल्या ४ दिवसांपासून पुणे शहरासह, पिंपरी चिंचवड आणि ग्रामीण भागातून बेपत्ता झालेल्या महिलांची माहिती घेतली जात आहे. त्या दिशेने तपास सुरू केला आहे.